Hagræðingarhópurinn enn að störfum

Hagræðingarhópur ríkisstjórnarinnar, sem skipaður er fjórum stjórnarþingmönnum, er enn við störf. Hópurinn fundaði nýverið með fulltrúum allra ráðuneyta til að fylgja eftir tillögunum sem hópurinn lagði fram á síðasta ári. Ekki er von á fleiri tillögum frá hópnum.

Hittast enn á fundum

„Í rauninni er það á ábyrgð ríkisstjórnarinnar að framfylgja tillögunum beint en okkar verkefni er að hafa eftirlit með því og höfum gert það. Við erum nýlega búin að funda um það,“ segir Ásmundur Einar Daðason, þingmaður og formaður hagræðingarhópsins.

Ásmundur segir ekki von á fleiri tillögum frá hópnum. „Ekki að svo stöddu en það veit enginn hvað gerist í framtíðinni,“ segir hann. „Enda sýnist mér nú að það sé nóg undir þarna, í það minnsta af kerfisbreytingum, er ekki ágætt að reyna að sigla einhverju af þessu í höfn áður en við ræsum út fleiri báta.“

Ábyrgðin hjá hverju ráðuneyti

„Í rauninni setti ráðherranefnd ríkisstjórnarinnar það á ábyrgð viðkomandi fagráðuneyta að fylgja síðan tillögunum eftir,“ útskýrir Ásmundur. „Þannig að þar liggur í rauninni framkvæmdin en við höfum eftirlit og eftirfylgni eftir þeim.“

Aðspurður segir hann tillögur hópsins fara misvel í ráðherra, allt eftir um hvaða tillögu ræðir. „Auðvitað er það misjafnt eftir verkefnum,“ segir hann en bætir við að hann hafi ekki fundið fyrir öðru en að vilji sé til þess að hagræða. „Enda þarf það að gerast ef að við ætlum að ná niður rekstrarkostnaði ríkisins frekar.“

Aðrir meðlimir hópsins eru Vigdís Hauksdóttir, formaður fjárlaganefndar, Guðlaugur Þór Þórðarson og Unnur Brá Konráðsdóttir. Þá starfa Arnar Þór Másson, skrifstofustjóri í forsætisráðuneytinu, og Sigurður Helgason, skrifstofustjóri í fjármála- og efnahagsráðuneytinu, með hópnum.