Óánægja meðal lækna: Fundur með ráðherra ekki sýndur í beinni

Mikill hiti var í fundargestum á aðalfundi Læknafélags Íslands sem fram fór í dag. Kristján Þór Júlíusson heilbrigðisráðherra flutti ræðu á fundinum auk þess að svara spurningum fundargesta. Var fundurinn sérstaklega vel sóttur en mikil reiði er í stétt lækna með stöðu heilbrigðismála á Íslandi. Kjarasamningur ríkisins við íslenska lækna rann út þann 31. janúar eða fyrir tæpum átta mánuðum.

„Ég stend ekki hér til að reyna að sannfæra ykkur eða aðra um að íslenska heilbrigðiskerfið sé eins og best verður á kosið og hafið yfir gagnrýni. Ég veit eins vel og þið að þannig er það ekki. Ég, eins og þið, veit að við getum gert miklu betur,“ sagði ráðherra í ræðu sinni.

Fjölmargir læknar á landsbyggðinni og erlendis sýndu því áhuga að geta fylgst með aðalfundinum í beinni útsendingu á lokuðu neti lækna. Ekkert varð hins vegar af því að fundurinn yrði sendur út beint. Þetta mæltist ekki vel fyrir hjá fjölmörgum læknum sem ekki áttu heimangengt, sem vildu fylgjast með pallborðsumræðum með heilbrigðisráðherranum. Þar beindu fundargestir spurningum til ráðherra, meðal annars hvort hann hefði áhyggjur af landflótta lækna frá Íslandi og hvort hann teldi boðlegt að grunnlaun lækna að loknu ámi næðu ekki grunnframfærsluviðmiðum velferðaráðuneytisins.

Í samtali við Vísi segir Þorbjörn Jónsson, formaður Læknafélags Íslands, að komið hafi til umræðu að senda fundinn út á netinu. „Við vorum að spökulera í því í ár – þó svo að það hafi ekki verið hefð fyrir því að senda út frá aðalfundinum,“ segir Þorbjörn en bætti við hafi þó tíðkast að senda út frá öðrum fundum félagsins. 

Aðspurður um hvort hefðarrök hafi ráðið för við ákvörðunina um að senda ekki út frá fundinum sagði Þorbjörn svo ekki hafa verið. Fleiri þættir hafi komið til. „En ég tjái mig ekki um það,“ segir Þorbjörn. Samkvæmt heimildum Vísis gerði ráðherra athugasemd við það að pallborðsumræðurnar yrðu teknar upp og sendar beint út. 

Þorbjörn segir „ákveðinn hita“ hafa verið í fundarmönnum í umræðunum með ráðherra en að umræðurnar hafi þó verið „ágætar“. Fundurinn hafi verið vel sóttur og margir tekið til máls. Þorbjörn segir að ráðherrann hafi aldrei áður setið jafn lengi á rökstólum við fundargesti aðalfundarins eins og í ár - eða í um tvo og hálfan tíma. Það var þó almenn skoðun lækna sem fundinn sátu, samkvæmt heimildum Vísis, að fátt hefði verið um svör hjá ráðherra við þeim spurningum sem brunnu á vörum lækna. Bar þar hæst hvernig ráðherra ætlaði að leiðrétta kjör lækna og stöðva aukin flótta lækna til starfa erlendis en nokkrar spurninganna má sjá hér að neðan:

Hefur ráðherra ekki áhyggjur af læknaskorti og landflótta lækna frá Íslandi?

Til hvaða sértæku aðgerða hefur ráðherra gripið og/eða hyggst grípa til að snúa þróuninni við?

Telur ráðherra boðlegt að grunnlaun lækna eftir sex ára háskólanám nægi ekki til grunnframfærslu?

Hvernig hyggst ráðherra tryggja að lágmarkslaun lækna verði leiðrétt til jafns við aðrar stéttir og í hlutfalli við lengd náms, ábyrgð og álag í starfi?

Hvernig hyggst ráðherra beita sér til að tryggja að kjarasamningaviðræður við lækna klárist án átaka?

Ekki náðist í Kristján Þór Júlíusson við gerð fréttarinnar.