"Langar að fara og berja þetta fífl í frumeindir“

Lögreglan á Suðurnesjum höfðar nú mál á hendur 46 ára karlmanni sem gefið er að sök að hafa hótað öðrum manni líkamsmeiðingum og lífláti í maí síðastliðnum. Hótanirnar urðu það alvarlegar að maðurinn óttaðist um líf sitt, heilbrigði og velferð.  Brot ákærða gætu varðað tveggja ára fangelsi.

Ákærði sendi hótanirnar í skilaboðum í gegnum Facebook til fyrrverandi kærustu sinnar, en þær voru ætlaðar þáverandi kærasta hennar.

Hér að neðan má sjá skilaboðin.

21.46: „Ég hugsa að ég drepi hann næst þegar ég sé [hann] fyrir að eyðileggja lífið sem ég þráði svo segðu honum að passa sig að vera ekki fyrir mér er endanlega búinn að sjá að hann hefur þig í vasanum og spilar með þig eins og hann vill svo bæbæ“

21.47: „Fer til [hans] í kvöld og sendi hann ég veit ekki hvert“

21.50: „En þetta eru mín lokaorð bless og varaðu [hann] við hann á ekki gott skilið frá mér.“

22:14: „En ok farðu þá bara til helvítis fíflsins, ef ég verð ekki á undan þér.“

22.18: „En þessi maður er búinn að eyðileggja mitt samband við þig og þú ert bara nokkuð ánægð með það svo hann má passa sig.“

22.40: „En þitt er valið ræði þetta ekki meir en [hann] þoli ég ekki og mér er sko nákvæmlega sama þótt öll lögreglan á landinu viti að ég þoli hann ekki og meira að segja þótt hann dræpist þá mættu þeir gruna mig fyrstan af öllum alveg slétt sama hann er búinn að fara yfir strikið og svona ákvarðanir hef ég aldrei á ævinni bakkað með.“

23.42: „Langar að fara og berja þetta fífl í frumeindir helvítis djöfulsins fífl.“

23.57: „ Já best kannski bara að ég fari til hans og leyfi honum að finna hvernig hann hefur látið mér líða allan þennan tíma.“

23.58: „Djöfull langar mig til að fara og angra þetta helvítis fífl sem þú ert blinduð af.“

12.22: „[Hann] skal fá að muna eftir mér það sem hann á eftir ólifað þvílíkur ræfill.“

12.23: „Er farinn til [hans] og bíð eftir honum þar.“

Sem fyrr segir gætu brot mannsins varðað tveggja ára fangelsi en þess er krafist að maðurinn verði dæmdur til refsingar og til greiðslu alls sakarkostnaðar.