Sló mann með hafnaboltakylfu

Héraðsdómur Vestfjarða hefur dæmt karlmann í tveggja mánaða skilorðsbundið fangelsi fyrir sérstaklega hættulega líkamsárás, fíkniefnalagabrot, tollalagabrot og vopnalagabrot.

Maðurinn sló annan mann í bakið með hafnaboltakylfu í miðbæ Ísafjarðar aðfaranótt sunnudagsins 3. febrúar 2013. Hlaut hann mar og eymsli á baki við höggið.

Maðurinn var einnig dæmdur fyrir vörslu kannabisefna og stera auk þess sem hann átti haglaskot, blýskot, plastskot og loftskammbyssu. Lögreglan fann fíkniefnin og vopnin við húsleit og lagði hald á þau.