Vafasamir kónar í umferðinni

Lögregla fékk tilkynningu um að ölvaður ökumaður væri á ferð við Öskjuhlíð. Þetta var um klukkan fjögur í nótt.

Lögregla stöðvaði bifreiðina á Suðurhlíð og er ökumaður grunaður um akstur undir áhrifum áfengis og fíkniefna, eins og segir í dagbók lögreglu. Þar kemur jafnframt fram að ökumaðurinn hefur aldrei tekið bílpróf. Farþegi í bílnum var einnig handtekinn grunaður um vörslu fíkniefna.

Þá stöðvaði lögregla bíl í Skipasundi í gærkvöldi. Þar voru tveir félagar á ferð, ökumaðurinn er grunaður um akstur undir áhrifum fíkniefna og farþegi grunaður um vörslu fíkniefna.