Ísskápurinn lækkar um 15 þúsund en matarkarfan hækkar um 21 þúsund

Reikna má með því að meðaldýr ísskápur muni lækka um 15 þúsund krónur í kjölfar niðurfellinga vörugjalda og lækkunar á efra þrepi virðisaukaskatts sem ætlað er að ráðast í um áramótin. Það er langtum minna en reiknað er með að matarkarfan hækki á ársgrundvelli.

Árni Páll Árnason, formaður Samfylkingarinnar, tók dæmi af sjálfum sér í umræðum um virðisaukaskattshækkanirnar í vikunni þar sem hann sagði að ísskápurinn sem hann hefði keypt árið 2001 mætti lækka ansi mikið í verði til að vega upp á móti öllum þeim matarkörfum sem hann hafði keypt á því tímabili.

Lækkunin miðar við innkaupaverð

Niðurfelling vörugjalda nær aðeins til innkaupaverðs raftækja og hafði Vísir því samband við smásöluaðila á raftækjamarkaði til aðstoðar við útreikningana. Samkvæmt birtum útreikningum Rannsóknarseturs verslunarinnar mun matarkarfan hinsvegar hækka um 21.029 krónur að jafnaði við hækkanir á virðisaukaskatti á matvæli. Sé aðeins horft á tekjulægsta hópinn nemur hækkunin 16.763 þúsund krónum.

Lækkunin á ísskápnum nær því ekki að vega upp matarhækkunina á einu ári. 

Þarf að skila sér að fullu til neytenda

Fleiri vörur en ísskápar munu lækka í verði með niðurfellingu vörugjalda og lækkunar efra þreps virðisaukaskatts. Samkvæmt útreikningum stjórnvalda mun lækkunin leiða af sér nokkur þúsund króna sparnað fjölskyldna á ársgrundvelli.

Fyrirvari er þó settur við þetta í frumvarpinu en þar segir að til þess að útreikningar um verðlagsáhrif standist þurfi öll lækkunin að skila sér til neytenda. Tekist hefur verið á um hvort sagan gefi ástæðu til bjartsýni um það. Stjórnarliðar vilja meina að svo sé á meðan stjórnarandstæðingar segja að hækkanir muni skila sér en lækkanirnar ekki.

Uppfært klukkan 14.26 með nýjum útreikningum Rannsóknarseturs verslunarinnar sem taka tillit til lækkunar sykurskatts sem fyrri útreikningar stofnunarinnar gerðu ekki ráð fyrir