Ráðuneytið segir fyrirspurn ESA hafa komið á óvart

Eins og Vísir greindi frá í morgun hefur ESA, Eftirlitsstofnun EFTA, sent íslenskum stjórnvöldum erindi þar sem útskýringa er krafist á því hvers vegna ekki sé búið að innleiða Evrópulöggjöf um raforku hér á landi. Sjö ár eru síðan stjórnvöld áttu að innleiða löggjöfina.

Erindi ESA kemur í kjölfar kvörtunar sem stofnuninni barst þann 8. ágúst síðastliðinn. Í kjölfarið sendi ESA bréf til iðnaðar- og nýsköpunarráðuneytisins þar sem ráðuneytið er krafið svara um ýmis atriði er varða innleiðingu Evrópulöggjafar í orkumálum áður en formleg athugun verður hafin.

Atvinnuvega- og nýsköpunarráðuneytið sendi í kvöld frá sér tilkynningu þar sem segir að á árunum 2008 til 2010 hafi ráðuneytið átt í bréflegum samskiptum við ESA vegna innleiðingar á umræddri tilskipun, númer 2003/54/EB. Síðasta bréf þess efnis fór frá ráðuneytinu til ESA þann 7. maí 2010.

Í framhaldi af kvörtuninni sem barst ráðuneytinu þann 8. ágúst sendi ESA fyrirspurn til ráðuneytisins liðlega þremur vikum síðar, þann 27. sama mánaðar, um hvernig hafi verið staðið að innleiðingu á nokkrum þáttum tilskipunarinnar.

Í tilkynningu segir að ráðuneytinu hafi borist bréf fyrir tveimur dögum og er nú þegar hafin vinna við að svara því.

„Fyrirspurn ESA um innleiðingu tilskipunarinnar, nú rúmum fjórum árum eftir síðustu bréfaskipti ESA og ráðuneytisins, kemur á óvart en að sjálfsögðu mun ráðuneytið fara vel í gegnum þau atriði sem koma fram í fyrirspurninni og leggja að nýju mat á hvort hugsanlega eigi eftir að innleiða einhverja þætti í umræddri tilskipun,“ segir í tilkynningunni en svarfrestur er til 15. nóvember, „og verður ESA svarað fyrir þann tíma.“