100 þúsund gefi höfundur Staksteina sig fram

„Ef þessi aðili er tilbúinn að gangast við því að hafa skrifað Staksteina dagsins og heita því að gefa 100.000 kr. til góðgerðamála um hver mánaðamót næstu 12 mánuði mun ég gera slíkt hið sama á móti.“ Þetta skrifar píratinn og borgarfulltrúinn Halldór Auðar Svansson á Facebook síðu sína en hann er ósáttur við Staksteina Morgunblaðsins fimmtudaginn 4.september.

Þar segir, undir yfirskriftinni „Leyndarmál meirihluta Pírata“, að Halldór hafi meðal annars fengið greitt fyrir að þegja um upplýsingar og starfsemi Reykjavíkurborgar.

Í Staksteinum blaðsins segir orðrétt:

„Og kjósendur pírata ættu ekki að gera ráð fyrir að fulltrúar þeirra muni rugga bátnum, enda var greitt með vel launuðu gæluverkefni fyrir þögnina.“ 

Halldór segir að þarna sé farið með ósannindi og meiðandi sé að sjá að gefið sé í skyn að gildi hans séu föl fyrir fé. „Ég til til dæmis þáði ekki skuldaleiðréttinguna svonefndu, þó ég hafi átt rétt á henni, af því mér hugnast ekki starfshættir þeirra sem gefa hana og vil ekki finnast ég skulda þeim nokkuð,“ skrifar Halldór jafnframt.

Halldór Auðar segir í samtali við Vísi að hann ætli ekki að reyna að giska á hver höfundurinn dularfulli kunni að vera. „Ég ætla ekki að reyna að giska á það, vonast bara til að það komi í ljós. Þetta eru það persónulegar ásakanir að mér þætti betra að vita frá hverjum þær eru komnar,“ segir Halldór.

Höfundurinn hefur ekki fallist á tilboð hans, en tilboðið hefur engan fyrningartíma.

Færslu Halldórs í heild sinni má sjá hér að neðan.

Innlegg frá Halldór Auðar Svansson.