Matur er stór hluti af lífi okkar allra

Hópur fólks hefur lengi barist fyrir viðurkenningu á matar- og sykurfíkn innan heilbrigðisgeirans, en matarfíkn er nú skilgreindur sjúkdómur í Bandaríkjunum.

,,Sumir segja að fíkn í mat sé örlítið ávanabindandi, en það er ekkert til sem er örlítið ávanabindandi. Þú getur ekki verið bara örlítið ólétt. Fíkn er eitthvað sem litar allt líf þitt. Matarfíkn er líka ein af erfiðustu fíknunum til að yfirstíga, allir þurfa að borða og matur er mjög stór hluti af lífi okkar allra," segir Bitten Jonsson, hjúkrunarfræðingur og sérfræðingur í fíknisjúkdómum.

,,En það eru margir öflugir óvinir sem við þurfum að kljást við. Það eru margir sem græða pening á því að selja fólki lausnir við offitu til dæmis," segir Bitten og bætir við að í matvælaiðnaðinum séu einnig valdamiklar blokkir sem hagnist á því að fólk viðhaldi fíkn sinni.

,,Þetta er svolítið sama barátta og alkóhólistarnir þurftu að taka á sínum tíma," segir Esther Helga Guðmundsdóttir, sérfræðingur í matarfíknimeðferðum.

Þær Esther og Bitten standa fyrir málþingi um matarfíkn sem haldið verður í Norræna húsinu á morgun.

,,Samkvæmt nýjustu tölulegu rannsóknum sem eru að berast má leiða líkur að því að 30 til allt að 45% vesturlandabúa glími við sykur- eða matarfíkn á einhverju stigi. Bæði stjórnvöld og fagfólk hér á landi sem og erlendis þurfa virkilega að fara að taka við sér og setja fjármagn í málaflokkinn.  Það eru sjálfsögð mannréttindi að fá greiningu á því sem þjáir okkur innan heilbrigðiskerfisins og það er ekki að gerast í dag," segir Esther.

Við höldum áfram umfjöllun um matarfíkn í fréttum okkar á morgun og sýnum þá viðtal við  Agnesi Þóru Guðmundsdóttur, sem þekkir baráttu og bata matarfíkilsins af eigin raun, eins og sjá  má í meðfylgjandi myndskeiði.