Íslenskir vísindamenn í návígi við hvítabjörn

Íslenskir vísindamenn sem eru við rannsóknir og kennslu á Svalbarða komust í mikið návígi við hvítabjörn í seinustu viku.

Sverrir Aðalsteinn Jónsson, jöklajarðfræðingur við Háskóla Íslands, er á Svalbarða. Hann segir ekki neina hættu hafa verið á ferðum en þó þurfi alltaf að vera á varðbergi gagnvart hvítabjörnum.

„Hópur Norðmanna sem kom þarna á eftir okkur lenti í bölvuðum vandræðum vegna þessa sama bjarnar,“ segir Sverrir. „Þeir voru einungis með tjöld með sér þar sem þeir bæði gistu og geymdu matvæli. Björninn rann á lyktina af matnum en við höfðum aðgang að skála og gátum geymt matinn okkar þar. Einnig sáum við að hann veiddi sel svo hann var ekki glorhungraður meðan við vorum þarna. Einnig höfðum við hunda með okkur sem er lykilatriði. Hins vegar var nauðsynlegt að hafa ísbjarnarvakt allar nætur þar sem við skiptumst á og tveir voru saman á vakt.“

Hvítabirnir ekki drepnir nema í sjálfsvörn

Að sögn Sverris var ísbjörninn orðinn nokkuð óhræddur og það sé aldrei gott. Hann hafi því ekki hörfað þegar Norðmennirnir reyndu að fæla hann í burtu með hvellskotum úr blysbyssu en það höfðu Íslendingarnir einnig gert. Sverrir segir að líklegt sé að hann hafi áttað sig á því að byssuskotin væru ekki hættuleg og því ekki hörfað frá norska hópnum.

Í samtali við NRK sagði Christian Svarstad, lögreglustjóri á Svalbarða, hættu hafa verið á ferðum. Norski hópurinn hafi þurft að flýja búðirnar sínar þar sem ísbjörninn fældist ekki frá. „Það var rétt ákvörðun að rýma búðirnar frekar en að drepa björninn. Það er aðeins gert í sjálfsvörn,“ sagði Svarstad.

Svarstad segist ekki vita hvers vegna björninn hræddist ekki hvellskotin en lögreglan muni skoða það. Hann segir að í sumar hafi verið nokkuð um að menn og hvítabirnir hafi komist í mikið návígi og að hann viti um fleiri tilfelli þar sem birnir hafi ekki hörfað þegar reynt var að fæla þá frá.