Fær 5,3 milljónir eftir fall af pílatesbolta

Vátryggingafélagi Íslands hefur verið gert að greiða konu 5,3 milljónir króna eftir að hún slasaðist í líkamsræktarstöðinni World Class í desember 2011. Þá var konan að gera kvið- og bakæfingar á námskeiði og féll af pílatesbolta á vinstri öxlina.

Hlaut hún alvarlega áverka og á sjúkrahúsi kom í ljós að hún hlaut alvarlegt brot á efri enda upphandleggs. Varanleg örorka konunnar var metin sjö prósent.

Fram kemur í dómnum að æfingin hafi verið tekin undir lok tímans og að um helmingur hópsins á námskeiðinu hafi tekið þátt. Gekk hún út á að iðkandinn átti að hvíla hendur og hné á pilatesbolta, sem er um 65 sentimetrar að hæð. Þá átti að losa fætur frá gólfi og reisa sig hægt og rólega upp.

Niðurstaða dómsins er að World Class bæri ábyrgð á slysinu og að auðvelt hefði verið að draga úr hættu æfingarinnar með því að tveir og tveir gerðu hana saman, eða með því að gera hana upp við vegg.

Konan hafi ekki verið vöruð við því að æfingin gæti verið varasöm og að hún hafi virst einföld þegar leiðbeinandi sýndi hana.

Vátryggingarfélagið var dæmt til að greiða konunni 5,3 milljónir króna og eina milljón króna í málskostnað.

Dóminn í heild sinni má lesa hér á heimasíðu Héraðsdóms Reykjavíkur.