Fann pappalíkkisturnar fyrir Ómar Ragnarsson

Fjölmargir hafa lýst yfir vonbrigðum sínum með þá ákvörðun RÚV að afþakka pistla Kristins R. Ólafssonar í Síðdegisútvarpinu. Líkt og Vísir greindi frá í gær var Kristni tilkynnt að pistla hans væri ekki frekar óskað í þáttunum sem verið er að breyta.

Ómar Ragnarsson er einn fjölmargra sem kemur til með að sakna Kristins. Kastaði hann kveðju á Kristin á Facebook-síðu pistlahöfundarins í gær.

„Mikið væri gaman ef þú höfuðsnillingur pistlanna læsir í kveðjuskyni einhvern æðisgengnasta útvarpspistil sögunnar, sem þú fluttir á sínum tíma um spánskar pappalíkkistur. Vonandi áttu hann ennþá,“ skrifaði Ómar og ekki stóð á svörum hjá Kristni í dag.

Pistlahöfundurinn spænskumælandi og orðheppni fann að sjálfsögðu pistilinn um pappalíkkisturnar frá 2004 fyrir Ómar vin sinn og birti á vefsíðunni Soundcloud. Hægt er að hlusta á pistilinn í heild sinni hér að neðan.

Aðdáendur Kristins geta hlustað á fleiri skemmtilega pistla frá Kristni eins og til dæmis ljóð sem hann samdi á meðan Íslendingar börðust við Króata í síðasti umspilsleiknum í Zagreb um sæti á HM 2014 í knattspyrnu karla.

Sparklimrur Kristins má heyra hér að neðan. Þar segir meðal annars:

Best væri að hætta öllu harki

þessu hrímaða íslenska sparki

og leggjast í ljóð

handa lífsþreyttri þjóð

eins og metsölumelurinn Bjarki

Þá hafa tæplega 200 manns skráð sig í Facebook-grúppu undir yfirskriftinni „Við viljum Kristin R. Ólafsson áfram í Síðdegisútvarpinu“.