Engum starfsmönnum verði sagt upp

Hanna Birna Kristjánsdóttir innanríkisráðherra leggur á það áherslu að skrifstofur og starfstöðvar sýslumanna og lögreglustjóra um landið muni ekki taka breytingum þrátt fyrir breytt skipulag umdæma. Þá muni enginn missa vinnuna við breytingarnar.

Þetta var meðal þess sem fram kom á fundi í innanríkisráðuneytinu í dag um undirbúning að breyttu skipulagi umdæma sýslumanna og lögreglustjóra í samræmi við lög sem samþykkt voru á Alþingi á liðnu vori. Þetta kemur fram á heimasíðu ráðuneytisins.

Breyting á umdæmunum og aðskilnaður embætta sýslumanna og lögreglustjóra tekur formlega gildi 1. janúar næstkomandi en fram að því verður unnið að útfærslu breytinganna og eflingu embættanna að því er segir á vef ráðuneytisins.

Fundinn sátu þeir embættismenn sem skipaðir hafa verið forstöðumenn embættanna ásamt sérfræðingum ráðuneytisins og fleirum. Hanna Birna Kristjánsdóttir innanríkisráðherra ávarpaði fundinn í upphafi og fór yfir breytingarnar. Lagði hún áherslu á að skrifstofur og starfsstöðvar embættanna myndu haldast og að engum starfsmönnum yrði sagt upp.

Sérfræðingar ráðuneytisins fjölluðu síðan um eflingu embættanna, breytingar á skipulagi, stefnumótun þeirra, rætt var um fjármál og mannauðsmál, upplýsingakerfi og helstu verkefnin.

Næstu skref í breytingunum eru að nýir forstöðumenn skipa verkefnisstjórn, hver í sínu umdæmi, og virkja starfsmenn til þátttöku. Verkefnisstjórn í hverju umdæmi skal sjá um að undirbúa verk-, tíma- og kostnaðaráætlum um breytingar og hrinda í framkvæmd. Ráðuneytið tilnefnir tenglið við embættin. Jafnframt verður á næstunni sett reglugerð um hvar aðalstöðvar viðkomandi embætta verða.