„Þetta er algjör slysagildra og alveg ömurlegt fyrir mig að lenda í þessu“

„Þetta er algjör slysagildra og alveg ömurlegt fyrir mig að lenda í þessu“ segir Atli Már Sveinsson sem handleggsbrotnaði í hjólreiðaslysi við Gullinbrú á fimmtudag.

Atli var að hjóla úr Grafarvoginum á leið undir Gullinbrú þegar hann mætti öðrum hjólreiðamanni sem kom fyrir blindhorn sem er undir brúnni. „Við sáum hvorn annan of seint og hjóluðum framan á hvorn annan. Hann var á hærra hjóli en ég svo hann lenti beint á framhandleggnum. Ég fann strax að handleggurinn var brotinn,“ segir Atli. Hinn hjólreiðamaðurinn slapp vel frá slysinu að sögn Atla: „Hann brotnaði ekki en marðist aðeins hnúunum.“

Atli braut beinið sveif í framhandleggnum og verður frá vinnu um einhvern tíma. „Ég vona að ég verði ekki með skerta hreyfigetu eftir slysið. Ég fór í aðgerð þar sem beinið var fest saman með járnplötu og sex skrúfum sem ég mun þurfa að bera alla ævi. Ég vona bara að ég verði ekki of lengi frá vinnu.“

„Ég hef áður verið nálægt því að lenda í slysi þarna og ég veit um fleiri sem hafa verið nálægt því. Það voru speglar þarna en þeir voru teknir niður,“ segir Atli en bætir við að líklegt hafi skemmdarverk átt þátt í að speglarnir hafi verið teknir niður. Myndband af aðkomunni á blindhorninu má sjá neðst í fréttinni en þar munaði mjóu að slys yrði.

Framkvæmdir vegna blindhornsins hefjast í haust

Stefán Agnar Finnsson, yfirverkfræðingur hjá umhverfis- og skipulagssviði Reykjavíkurborgar segir að framkvæmdir muni hefjast í september til að laga aðkomu fyrir hjólreiðamanna að Gullinbrúnni. „Framkvæmdirnar verða boðnar út seinni hluta mánaðarins, það tekur einhverjar vikur að ganga frá tilboðum og formlegheitum en ég á von á því að framkvæmdir hefjist í september. Þá verður þetta opnað meira þannig að þetta blindhorn hverfi og sjónlínan verði betri.“

Krístín Soffía Jónsdóttir, borgarfulltrúi Samfylkingarinnar deildi mynd inn á hópnum Samgönguhjólreiðar á Facebook þar sem hún sagði frá drögum að hvernig hinn nýji hjólreiðastígur myndi líta út. Krístin lagði áherslu á að hönnun stígsins væri í vinnslu og því ekki víst að um endanlega hönnun væri að ræða.

Aðspurður hvort Reykjavíkurborg beri einhverja ábyrgð á slysinu segist Stefán ekki telja svo vera: „Maður verður að miða sína hegðun eftir aðstæðum á hverjum stað. Það er ekki hægt að gera veghaldara ábyrgan sem slíkan.“

Hér að neðan má sjá myndband þar sem litlu munaði að yrði slys vegna blindhornsins við Gullinbrú.