Uglum snarfjölgar á Íslandi

Mjög færist í aukana að fólk reki augu í uglur þegar það á leið um náttúru Íslands. Og, það er engin tilviljun – en ekki er víst að öllum líki ástæðan fyrir þessu.

Fleiri mýs – fleiri uglur

Jóhann Óli Hilmarsson hjá Fuglavernd hefur rannsakað uglu á Íslandi og raunin er sú að uglu hefur verið að fjölga verulega nú á allra síðustu árum.

„Já, það eru að batna fæðuskilyrði músa sem er aðal fæðutegund branduglunnar. Með aukinni kornrækt og svo lúpínunni hafa mýsnar meira að éta og þar af leiðandi uglan líka.“

Þetta fylgir hvert öðru. Fleiri mýs, fleiri uglur. Branduglustofninn hefur tvöfaldast.

„Þar sem ég hef verið að fylgjast með honum síðustu 12 árin í hluta Flóa í Ölfusi, þá hefur hann tvöfaldast á undanförnum tíu árum.“

Eyrugla að festa sig í sessi

Jóhann Óli segir reyndar úrtakið ekki stórt en þetta gefur ótvíræðar vísbendingar almennt. Og ekki er það bara branduglan sem sækir í sig veðrið heldur hafa nýjar uglutegundir verið að nema land á Íslandi.

Eyruglan hefur verið að nema land hér í skógum, hún er skógarfugl en með aukinni skógrækt hefur skógarfuglum verið að fjölga hér á landi. „Og aðallega í sumarbústaðalandi. Eyruglan virðist vera hrifin af því. Ég held að fyrsta staðfesta varpið hafi verið árið 2000 og síðan hefur henni verið smátt og smátt að fjölga. Hún hefur fundist Norðanlands en aðallega hafa menn orðið varir við hana á Suðurlandi. Hún er mjög svipuð branduglunni þannig að það er erfitt að greina þær nema maður sjái þær á stuttu færi. Þær eru nánast eins á flugi og því má vel vera að þetta séu eyrugulur sem fólk sér en telur sig vera að sjá branduglu.“

Uglan er fallegur fugl og svo er það náttúrlega sjálf snæuglan; sem margir hrífast af. Að sögn Jóhanns Óla er hún hér ávallt viðloðandi og hann telur hana verpa árlega á Íslandi. En, hennar fæðuskilyrði eru reyndar helst læmingjar og þá finnur snæuglan á Grænlandi.

„Snæuglan hér verður að gera sér að góðu fugla og mýs og það eru ekki eins góð skilyrði fyrir hana hér.“

Snæuglan er gríðarlega fallegur fugl, en stygg og erfið að fylgjast með og vita menn því ekki mikið um hana.

Hefurðu rekist á uglu á Íslandi? Sendu okkur endilega mynd á ritstjorn@visir.is