Innlent

Ekki hægt að horfa framhjá innflytjendabreytunni

Kolbeinn Tumi Daðason skrifar
Hildur Björk Svavarsdóttir hjá Reykjavíkurborg segir merki um miklar framfarir hjá nemendum Fellaskóla undanfarin ár.
Hildur Björk Svavarsdóttir hjá Reykjavíkurborg segir merki um miklar framfarir hjá nemendum Fellaskóla undanfarin ár.
67 prósent nemenda í Fellaskóla eru af erlendu bergi brotnir. Nemendur við skólann koma illa út úr niðurstöðum PISA-rannsóknarinnar sem birt var í dag.

Hildur Björk Svavarsdóttir, deildarstjóri tölfræði- og rannsóknarþjónustu skóla- og frístundasviðs hjá Reykjavíkurborg, segir ekki hægt að líta framhjá innflytjendabreytunni í Fellaskóla. Þar séu 67 prósent nemenda af erlendu bergi brotin á sama tíma og prófið, sem þreytt sé, sé á íslensku.

„Prófið er líka flókið og með tiltölulega mikið af upplýsingum,“ segir Hildur Björk í samtali við Vísi. Þá sé Fellaskóli heiðarlegur skóli að því leyti að allir nemendur eru látnir þreyta prófið óháð íslenskukunnáttu. Tveir skólanna sendu aðeins helming nemenda í prófið. Meðaltalsþátttakan í rannsókninni, sem fram fór árið 2012, hafi verið í kringum 80 prósent.

Hildur minnir á að nemendafjöldinn í þeim skólum sem komu verst út úr rannsókninni, Klébergsskóla á Kjalarnesi auk Fellaskóla í Breiðholti, sé sérstaklega lítill. Aðeins tuttugu nemendur hafi tekið prófið í Fellaskóla og sextán í Klébergsskóla. Því geti árangur einstakra nemenda haft enn meiri áhrif á heildarniðurstöðuna.

Allt á uppleið

Hildur minnir á að PISA-prófið sé ekki það áreiðanlegasta. Nemendur fari heim úr prófinu meðvitaðir um að niðurstaðan skipti þá engu máli. Vísar Hildur Björk í viðtöl við nemendur að loknum PISA-prófum sem kláruðu prófið eins hratt og mögulegt var til að komast sem fyrst heim. Þeir sögðust ekki hafa lagt sig sérstaklega fram. Kannski ekki að furða enda fá þeir ekki einu sinni að sjá einkunn sína. Ólíkt til dæmis í Samræmdum prófum. Niðurstöðurnar þar gefi áreiðanlegri upplýsingar að sögn Hildar.

„Framfarastuðlar í Fellaskóla hafa verið mjög góðir,“ segir hún um samanburð á árangri nemenda í prófunum undanfarin ár. Skoðaðar hafa verið niðurstöður nemenda úr 7. bekk og upp í 10. bekk. Þótt einkunnirnar séu enn nokkuð lágar eru nemendur að sýna framfarir. Skólinn sé að ná árangri.

Þá hafi verið ráðist í aukið starf meðal nemenda yngstu bekkja í Fellaskóla með góðum árangri. Nemendur í 1. og 2. bekk hafi fengið lengri skóladaga foreldrum að kostnaðarlausu þar sem lögð er áhersla á kennslu í íslensku.

„Það er að skila sér verulega,“ segir Hildur Björk.

Forráðamenn nemenda ráða því hvort barn þeirra þreyti prófið eður ei. Sömuleiðis geti skólastjórnendur fært rök fyrir því að einstaka nemendur taki ekki prófið.


Tengdar fréttir

Meiri umhyggja borin fyrir stúlkum en drengjum

Útkoma íslenskra grunnskólabarna í PISA könnunum var rædd á Alþingi í dag. Tíundu bekkingar hafa ekki mikla trú á þessum könnunum og skólastjóri segir vandan á vissan hátt mennningarlegan.

Reykjavíkurborg skylt að afhenda niðurstöður PISA

Reykjavíkurborg synjaði beiðni um að afhenda niðurstöður rannsóknarinnar á þeim forsendum að um vinnugögn hafi verið að ræða. Úrskurðarnefnd um upplýsingamál féllst ekki á það.

Gátum ekki lagt fyrir PISA próf í tölvum

Ísland er eina landið sem ekki tók þátt í PISA könnun á getu unglinga til að leysa þrautir. Niðurstöður voru birtar í byrjun vikunnar. Prófið þurfti að taka í tölvu og ekki fjármagn fyrir hendi til leggja það fyrir hér. Erum næst með árið 2015.

Borgaskóli kom best út úr PISA

Hæfni nemenda var metinn eftir þremur þáttum; stærðfræðilæsi, lesskilningi og náttúrufræðilæsi.




Fleiri fréttir

Sjá meira


×