Kólumbía í fyrsta sinn í 8-liða úrslit | Myndir

Kólumbía vann öruggan 2-0 sigur á Úrúgvæ á Maracana vellinum í Ríó de Janeiro í seinni leik dagsins í 16-liða úrslitunum á HM í Brasilíu.

Kólumbíumenn tóku strax frumkvæðið í leiknum og voru mun meira með boltann. Þeir fundu þó fáar leiðir í gegnum vörn Úrúgvæ sem lá mjög aftarlega.

Það þurfti eitthvað sérstakt til að brjóta lærisveina Oscars Tabarez á bak aftur og það kom frá James Rodriguez sem kom Kólumbíu yfir á 28. mínútu með stórkostlegu marki. Hann tók þá boltann á bringuna rétt fyrir utan D-bogann, sneri sér og þrumaði boltanum í slána og inn. Magnað mark hjá frábærum leikmanni.

Staðan var 1-0 í hálfleik, en það voru ekki liðnar nema fimm mínútur af seinni hálfleik þegar Rodriguez bætti öðru marki við. Það var ekki síður glæsilegt.

Kólumbíumenn létu boltann ganga frá hægri til vinstri þar sem bakvörðurinn Pablo Armero fékk boltann. Hann sendi yfir á fjærstöngina þar sem Juan Cuadrado reis hæst og skallaði boltann fyrir markið á Rodriguez sem setti boltann í markið af stuttu færi. Þetta var fimmta mark Rodriguez á HM en hann er nú markahæsti leikmaður mótsins.

Úrúgvæar reyndu hvað þeir gátu, en vörn Kólumbíu var sterk og fyrir aftan hana átti David Ospina mjög góðan leik í markinu. Það sást langar leiðir að Úrúgvæ saknaði Luis Suarez sem var dæmdur í fjögurra mánaða bann eins og frægt er orðið fyrir að bíta Giorgio Chiellini í leik gegn Ítalíu á dögunum.

Besta færi Úrúgvæa fékk hægri bakvörðurinn Maxi Pereira á 78. mínútu þegar hann komst inn fyrir kólumbísku vörnina, en Ospina varði skot hans. Sá síðarnefndi varði sömuleiðis vel skot fyrir utan vítateig frá Cristian Rodriguez og Edinson Cavani í seinni hálfleik.

Úrúgvæ tókst hins vegar ekki að skora og Kólumbíumenn unnu leikinn 2-0 og er komnir í átta-liða úrslit í fyrsta sinn í sögunni. Þar mætir liðið heimamönnum í Brasilíu, en leikurinn fer fram á Maracana á föstudaginn.