Kólumbía vann nauman sigur

Kólumbía vann nauman 2-1 sigur á Fílabeinsströndinni í C-riðli Heimsmeistaramótsins í dag. Öll mörk leiksins komu á fjórtán mínútna kafla í seinni hálfleik.

Leikmenn Kólumbíu höfðu tök á leiknum framan af en staðan var markalaus í hálfleik.

James Rodríguez kom Kólumbíu yfir um miðbik seinni hálfleiks og skömmu síðar bætti Juan Quintero við öðru marki eftir mistök í vörn Fílabeinsstrandarinnar.

Gervinho minnkaði muninn aðeins nokkrum mínútum síðar en lengra komust gestirnir ekki.

Kólumbía er með sex stig eftir tvo leiki á meðan Fílabeinsströndin er með þrjú stig í öðru sæti. Stigalausu liðin tvö, Japan og Grikkland mætast síðar í kvöld í seinni leik C-riðilsins.