Rigning í vændum

Landsmenn hafa ekki farið varhluta af blíðviðri síðustu daga og má segja að um nánast allt land hafi veðrið leikið við hvurn sinn fingur upp á síðkastið.

Þrátt fyrir að skýjað hafi verið yfir öllu landinu hefur verið óvenjulega hlýtt en á þremur stöðum á Suður –og Suðausturlandi fór hitinn yfir tuttugu gráður, við Kirkjubæjarklaustur, Hallormsstað og í Skaftafelli.

Elín Björk Jónasdóttir, veðurfræðingur hjá Veðurstofunni, segir það stafa af því að engrar hafgolu hafi notið við. „Hafgola verður þegar sól skín á land og landið hitast upp. Það verður því töluvert hlýrra en aðliggjandi sjór og við það myndast hitamismunur. Tekur þá kalt loft að streyma af hafi í leit sinni við að jafna hitamismuninn út,“ útskýrir Elín.

Samkvæmt Veðurstofunni má búast við því að í byrjun næstu viku taki að rigna um nánast allt land og að skil verði í veðrinu vestan til í nótt.  Þó verður áfram hlýtt í veðri og því ætti léttur pollagalli að vera kjörinn klæðnaður á næstu dögum.