Innlent

Samþykkt að hefja viðræður við einkaaðila um Sundabraut

Randver Kári Randversson skrifar
Hefja á viðræður við einkaaðila um undirbúning, hönnun og lagningu Sundabrautar.
Hefja á viðræður við einkaaðila um undirbúning, hönnun og lagningu Sundabrautar. Visir/Onnó
Ríkisstjórnin samþykkti í dag að hefja formlegar viðræður milli ríkisins og einkaaðila um undirbúning, hönnun og lagningu Sundabrautar í Reykjavík í því skyni að flýta mögulegum framkvæmdum. Þetta kemur fram í fréttatilkynningu frá innanríkisráðuneytinu.



Jafnframt kemur fram að unnið verður í samræmi við tillögur stýrihóps innanríkisráðherra sem hefur það hlutverk að skoða hvaða samgönguframkvæmdir koma til greina í samvinnu ríkis og einkaaðila. Ljóst sé að leita þurfi leiða til að fjármagna ýmis samgönguverkefni með öðru móti en beinum framlögum úr ríkissjóði.



Um leið og minna fjármagni hafi verið veitt til stofnframkvæmda í vegakerfinu fari þörfin sífellt vaxandi og því hafi verið ákveðið að kanna rækilega hvaða framkvæmdir sé unnt að ráðast í með samvinnu ríkis og einkaaðila, allt frá undirbúningi og hönnun, að rekstri og þjónustu við slík mannvirki. 



Fjögurra ára samgönguáætlun verður tekin til umfjöllunar þegar Alþingi kemur saman í haust, þar sem fjallað er um fyrirhugaða Sundabraut og að kostir einkaframkvæmdar verði skoðaðir.



Fréttatilkynning innanríkisráðuneytisins í heild: 





Undirbúningur hefst að hönnun

og lagningu Sundabrautar 

Ríkisstjórnin samþykkti á afmælisfundi sínum í dag tillögu Hönnu Birnu Kristjánsdóttur innanríkisráðherra um að hefja formlegar viðræður ríkisins og einkaaðila um undirbúning, hönnun og lagningu Sundabrautar í Reykjavík í því skyni að flýta mögulegum framkvæmdum. Yrði byggt á tillögum stýrihóps ráðherra sem hefur haft það hlutverk að fara yfir hvaða samgönguframkvæmdir koma til greina í samvinnu ríkis og einkaaðila.

Fjögurra ára samgönguáætlun liggur nú fyrir Alþingi og verður tekin til umfjöllunar þegar þing kemur saman að nýju í haust. Þar er meðal annars fjallað um fyrirhugaða Sundabraut og  að kostir einkaframkvæmdar verði skoðaðir. Í greinargerð með frumvarpi til fjárlaga segir einnig að umtalsvert fé þurfi til að viðhalda og byggja upp samgöngukerfi landsins á næstu árum og því talið rétt að huga að aðkomu einkaaðila í samstarfi við opinbera aðila. Í því sambandi verði litið til góðrar reynslu margra nágrannaþjóða af slíku samstarfi fjárfesta, rekstraraðila og ríkisvalds.

Um miðjan apríl skipaði ráðherra stýrihóp sem hefur það hlutverk að fara yfir hvaða samgönguframkvæmdir koma til greina í samvinnu ríkis og einkaaðila. Ljóst er að leita þarf leiða til að fjármagna ýmis og brýn samgönguverkefni með öðru móti en beinum framlögum úr ríkissjóði. Um leið og minna fé hefur á síðustu árum verið veitt í stofnframkvæmdir í vegakerfinu fer þörfin sífellt vaxandi og því var ákveðið að kanna rækilega hvaða framkvæmdir unnt væri að ráðast í með samvinnu ríkis og einkaaðila, allt frá undirbúningi og hönnun og að rekstri og þjónustu við slík mannvirki.

--------------

Fréttatilkynning frá innanríkisráðuneyti 23. maí 2014

 










Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.