Hafa þungar áhyggjur af þeirri stöðu sem nú er uppi í samgöngum Eyjamanna

Ferðamálasamtök Vestmannaeyja hafa sent frá sér ályktun til þingmanna, ráðherra og fréttamanna þar sem þau lýsa yfir miklum áhyggjum af þeirri stöðu sem upp er komin í samgöngumála Eyjamanna.

Isavia tók þá ákvörðun á dögunum að loka flugvellinum í Vestmannaeyjum á laugardögum, að minnsta kosti til loka aprílmánaðar.

Þetta hefur það í för með sér að á laugardögum verða líklega engar samgöngur til og frá Vestmannaeyjum, því kjarabarátta áhafnar Herjólfs felur í sér yfirvinnubann og siglir báturinn því ekki um helgar og afar langt ber á milli í kröfum áhafnarinnar og tilboði rekstraraðila Herjólfs.

Hér að neðan má lesa ályktunina:

Ferðamálasamtök Vestmannaeyja hafa þungar áhyggjur af þeirri stöðu sem nú er uppi í samgöngum Eyjamanna. Öllum hlýtur að vera ljóst að það gengur ekki að loka heilu byggðarlagi án þess að það hafi varanlegar eða langvarandi afleiðingar.

Sú pattstaða sem nú er komin í kjaradeilu undirmanna Herjólfs og rekstraraðila Herjólfs eykur ekki á bjartsýnina um að samningar náist í nánustu framtíð. Á meðan blæðir heilu samfélagi og ljóst er að áhrif deilnanna leggjast þungt á ferðaþjónustuna í Eyjum.

Ferðamálasamtök Vestmannaeyja skora á deiluaðila að endurskoða sýn sína á verkfallið og krefjast þess jafnframt að Alþingi tryggi rétt okkar Eyjamanna til að ferðast um þjóðveg okkar óháð kjaradeilum launþega og vinnuveitenda.

Fyrir hönd stjórnar  Ferðamálasamtaka Vestmannaeyja, Kristín Jóhannsdóttir - Ferða- og markaðsfulltrúi Vestmannaeyjabæjar.