Meiðyrðamál Jóns Steinars gegn Þorvaldi Gylfasyni í héraðsdómi

Jón Steinar Gunnlaugsson, fyrrverandi hæstaréttardómari, tilkynnti það í grein sem hann birti 30. maí árið 2012 í Morgunblaðinu að hann ætlaði að sækja Þorvald Gylfason háskólaprófessor til saka fyrir ummæli sem finna má í grein sem Þorvaldur skrifaði í ritröð háskólans í Munchen í Þýskalandi.

Málið snýst í grunninn um ákvörðun Hæstaréttar snemma árs 2011 í kærumáli þar sem framkvæmd kosningar til stjórnlagaþings 2010 var skotið til réttarins og var kosningin ógilt á þeim forsendum að á framkvæmd hennar höfðu verið annmarkar. Ummæli Þorvaldar, sem Jón Steinar reisir kæru sína á, eru eftirfarandi, í lauslegri þýðingu Jóns Steinars sjálfs:

„Þá gengur sá orðrómur meðal lögfræðinga, sem teljast til sérfræðinga í greiningu á lögfræðitextum hvers annars, að einn af dómurum Hæstaréttar, staðfastur flokksmaður áður en hann var skipaður dómari og þá tekinn fram fyrir þrjá hæfari umsækjendur samkvæmt áliti nefndar sem mat umsækjendur, hafi lagt drög að einni af kærunum sem Hæstiréttur, undir forystu sama dómara, nýtti sem átyllu til að ógilda kosningarnar. Ekki hafa þó verið færðar sönnur á þetta.“

Aðalmeðferð málsins er á morgun. Lögmaður Jóns Steinars er Reimar Pétursson og hann sagðist í samtali við Vísi hafa þá reglu að tjá sig ekki mikið um þau mál sem hann er með. „Ég vísa til þess að um þetta verður fjallað fyrir dómnum.“ Sigríður Rut Júlíusdóttir lögmaður er í vörninni fyrir Þorvald.

Jón Steinar segir ljóst af tilvitnuðum textanum að þessu skeyti prófessorsins sé beint að sér. „Í því felst aðdróttun um að ég hafi gróflega misfarið með vald mitt sem dómari við Hæstarétt Íslands með því að semja fyrst með leynd kæruskjal til réttarins og stjórna síðan afgreiðslu þess. Framferðið sem dylgjað er um að ég hafi viðhaft er áreiðanlega refsivert og hlyti ef satt reyndist að varða embættismissi,“ segir meðal annars í áðurnefndri grein Jóns Steinars, en þar er hann gallharður og getur vart leynt andúð sinni á Þorvaldi -- það fer vart á milli mála við lestur greinar hans:

Jón Steinar segir álitamál hvort ástæða sé til að eltast við þá lágkúru sem þessi skrif eru en ekki verði fram hjá því litið að um penna haldi prófessor við Háskóla Íslands, sem „hlýtur að teljast vísindamaður, því aðrir fá varla slík embætti eða ættu að minnsta kosti ekki að fá þau. Sjálfur gerir hann kröfu um að vera tekinn alvarlega í umræðum um þjóðfélagsmál, mætir í umræðuþætti og skrifar blaðagreinar. Er meira að segja svo að sjá að ýmsir taki orðræður hans alvarlega. Kannski treystir hann á að ég geti ekki stöðu minnar vegna borið hönd fyrir höfuð mér? Sé það rétt verð ég að valda honum vonbrigðum. Maður sem starfar sem dómari við Hæstarétt hefur ekki afsalað sér rétti til að bregðast við köpuryrðum og meiðingum sem beint er að persónu hans. Skárra væri það nú.“