Sóttu slasaða konu í Klambragil

Björgunarsveitir í Árnessýslu voru kallaðar út síðdegis eftir að erlend ferðakona slasaðist í Klambragili, sem er ofarlega í Reykjadal. Samkvæmt tilkynningu frá Landsbjörgu var konan á göngu, skipulagðri af íslensku ferðaþjónustufyrirtæki.

Konan meiddist á fæti og þurfti að bera hana um kílómetra langa leið, sem er víða brött og laus í sér. Konan var flutt í björgunarsveitabíl að Suðurlandsvegi þar sem sjúkrabíll beið.

Um tuttugu björgunarsveitarmenn komu að aðgerðinni.