Tillögur frá lesendum: Að dampa, blika eða eima?

Vísir auglýsti fyrir stuttu eftir tillögum að skemmtilegum þýðingum og útfærslum á enska sagnorðinu “vape”, sem höfundar Oxford-orðabókarinnar völdu í ár sem orð ársins í enskri tungu. Nýyrðið merkir „að reykja rafsígarettu“ og sá sem gerir það kallast “vaper.”

Viðbrögðin létu ekki á sér standa og tínum við hér saman nokkrar af bestu tillögunum.

Ari Brynjólfsson sendi tvær uppástungur í tölvupósti, sagnorðin að blika (dregið af nafnorðinu blika, sem merkir skýjabakki eða óveðursský) og að mista (dregið af nafnorðinu mistur, í merkingunni þoka). Notað í setningu myndi hið síðara hljóma svo: „Skemmtu þér úti að reykja, ég ætla að mista á meðan.“

Sögnin að dampa er í uppáhaldi hjá þeim Majd Abu Libdeh og Þresti M. Sveinssyni, sem tjá sig á Facebook. „Klárlega málið,“ segir sá fyrrnefndi.

Þó nokkrir sækja sér innblástur í vatnsgufuna sem fylgir rafreykingum. Að gufa er í uppáhaldi hjá mörgum og sömuleiðis leggja Halldór Hafsteinn og Kolbeinn Ari Hauksson til að nota sögnina að eima. Gufutotta, segir Freyr Helgason.

Þá segir Ingibjörn Valsson okkur í tölvupósti að nafnorðið gufustaur sé að sjálfsögðu gott heiti á rafsígarettu og að hægt væri að stytta það í gufa, sbr: „Komdu í gufu.“ Þeir Ingibjörn og Freyr Helgason leggja báðir til nafnorðið gufugleypir í stað “vaper.”

Fjölmargir stungu upp á sögnunum að rafa, að raffa og að rafreykja, sem vissulega eru nokkuð gegnsæ nýyrði. Nafnorðin rafreykingarmaður, rafari og rafri eru svo lögð til sem heiti á þeim sem iðkar slíka iðju.

„Einfalt, létt og skemmtilegt, það er bara þannig,“ skrifar Birgir Bragi Magnússon um sína tillögu: Að vappa, væntanlega dregið beint af enska heiti fyrirbærisins.Um veika sögn er að ræða og tekur Birgir Bragi dæmi um orðmyndirnar „í gær vappaði ég,“ „þessi gaur er vappari,“ og „vöppum saman.“ Sömuleiðis leggja Halldór Hafsteinn og Aron Sölvi Gíslason til yfirfærsluna að veipa.

Ingþór Ingólfsson slær svo í gegn á Facebook með nafnorðinu kúverpill, sem hljómar vissulega skemmtilega en Vísir áttar sig engan veginn á sifjum þess orðs.

Lumar þú á betri tillögu? Sendu okkur póst á ritstjorn@visir.is