Aðgerðir gegn Ísrael boðaðar næstu daga

Sniðgönguhreyfing fyrir Palestínu hefur verið formlega stofnuð á Íslandi.

Tilgangur hreyfingarinnar er að svara alþjóðlegu ákalli Palestínumanna um sniðgöngu og þvinganir gegn ísraelskum stjórnvöldum. Markmiðum hreyfingarinnar telst náð þegar Ísrael fer að alþjóðalögum og viðurkennir grundvallarréttindi Palestínumanna, og mun þá hreyfingin vera lögð niður.

Sema Erla Serdar, formaður hreyfingarinnar, segir að í viðskiptum sé alltaf valkostur og að á næstu dögum og vikum verði boðaðar aðgerðir.

„Fullt af fólki á von á fullt af bréfum frá okkur. Við munum upplýsa almenning um hvaða vörur eru frá Ísrael og hvetja fyrirtæki sem flytja inn vörur frá Ísrael til þess sama. Ef stjórnendur fyrirtækja eru ekki tilbúnir til sniðgöngu gerum við þá kröfu að vörurnar verði skýrt merktar frá Ísrael.“

Hreyfingin mun einnig gera þá kröfu til stjórnvalda að bregðast við ástandinu, að viðskiptaþvingunum verði beitt gegn Ísrael og stjórnmálasambandi slitið. Sema Erla segir að ganga verði alla leið enda snúist málið um brot Ísraelsmanna á alþjóðalögum trekk í trekk á meðan alþjóðasamfélagið er algjörlega lamað og horfi upp á kúganir gegn Palestínumönnum.

„Það var til dæmis leiðinlegt að sjá utanríkisráðherra kalla eftir viðbrögðum frá alþjóðasamfélaginu. Það er eins og hann hafi ekki gert sér grein fyrir því að við erum líka hluti af þessu alþjóðasamfélagi,“ segir Sema Erla og bætir við að Ísraelar eyði gríðarlegum fjármunum í hernað og uppbyggingu landnemabyggða og því sé sniðganga á framleiðslu afar áhrifarík leið.

Fjármálaráðherra Ísraels hefur lýst yfir að ef Evrópubúar halda áfram að sniðganga vörur frá Ísrael muni efnahagurinn í Ísrael horfa á eftir 5,7 milljörðum dollara og um tíu þúsund störfum.

Innflutningur frá Ísrael

Í fyrra voru fluttar inn vörur frá Ísrael fyrir tæpar 720 milljónir króna samkvæmt upplýsingum frá Hagstofunni.

Eingöngu á fyrstu sex mánuðum þessa árs var flutt inn fyrir rúmar 377 milljónir króna. Það lítur því út fyrir að innflutningur frá Ísrael til Íslands verði fyrir hærri upphæð á þessu ári en því síðasta. 

Snyrtivörur, matvæli og iðnaðarefni eru meðal vinsælla ísraelskra vara á íslenskum markaði.