Fyrsti „showrunner“ Íslands

„Við tókum þessa ákvörðun að fara á næsta stig með þetta,“ segir Sigurjón Kjartansson.

Hann er svokallaður „showrunner“ sjónvarpsþáttaraðarinnar Ófærð sem verður frumsýnd á næsta ári. Það þýðir að hann hefur yfirumsjón með framleiðslu þáttaraðarinnar, þar á meðal handritsvinnunni.

„Mitt hlutverk er að vera límið, frá handritsstiginu upp í tökustigið. Ég þarf að vera á staðnum og vera dálítið maðurinn með svörin þegar á hólminn er komið og hrista hópinn saman þannig að allir stefni í sömu átt,“ segir Sigurjón.

Þetta er í fyrsta sinn sem þessi háttur er hafður á hér á landi, sem er kannski ekki skrítið því kostnaðurinn við Ófærð er um milljarður króna og er þáttaröðin þar með sú dýrasta í Íslandssögunni. RVK Studios, sem er í eigu Baltasars Kormáks, framleiðir.

Fyrirmyndin er fengin að utan en í Bandaríkjunum hefur „showrunner“ haft yfirumsjón með þáttaröðum á borð við House of Cards og Breaking Bad. Danir hafa tekið þetta upp eftir Bandaríkjamönnum eins og þættirnir Forbrydelsen og Borgen bera vott um.

Ófærð, eða Trapped, eru drungalegir sakamálaþættir sem gerast á Seyðisfirði og verða sýndir á RÚV á næsta ári. Sigurjón er þessa dagana staddur í Lundarreykjadal þar sem hann lýkur við handrit síðustu tveggja þáttanna í samstarfi með Bretanum Clive Bradley, Klaus Zimmerman, sem hefur framleitt þáttaraðir á borð við Borgia og Transporter, og franska handritsráðgjafanum Soniu Moyerson.

„Ég hef alltaf haft mjög góða reynslu af hópvinnu, alveg síðan við vorum í Fóstbræðrum í gamla daga,“ segir Sigurjón, sem byrjaði að skrifa handritið fyrir tveimur árum með Ólafi Egilssyni og Jóhanni Ævari Grímssyni. Eftir að þeir sneru sér að öðrum verkefnum hóf hann samstarf með erlenda hópnum. Handritsvinnunni lýkur formlega um áramótin.

„Við förum líklega í tökur án þess að nokkur viti hver morðinginn er, nema við. Maður þurfti að vera dálítið með pókerfésið í framan þegar leikararnir voru að spyrja mig. Þeir mega ekkert vita. Þetta er á „need to know basis“ eins og sagt er.“