Lögmenn LEX telja MS afurðastöð

Samkvæmt úttekt Lögmannsstofunnar LEX „stenst það ekki nokkra skoðun“ að halda því fram að Mjólkursamsalan (MS) sé ekki afurðastöð í skilningi búvörulaga. Greint var frá því í gær að Mjólkurbúið KÚ hefur kært MS fyrir brot á samkeppnislögum en kæran byggir meðal annars á því að MS sé ranglega talin afurðastöð.

Greint er frá niðurstöðum úttektar LEX í fréttatilkynningu frá MS, sem óskaði eftir úttektinni. Til að teljast afurðastöð í skilningi búvörulaga þarf viðkomandi aðili að taka við mjólk eða annarri búvöru beint frá framleiðanda. Að mati LEX er „ekki nokkur vafi“ um að MS teljist vera afurðastöð, enda taki fyrirtækið við mjólk úr höndum framleiðenda til vinnslu, flokkunar, pökkunar, geymslu, heildsölu og dreifingar.

Þá starfi MS á grundvelli afurðastöðvaleyfis frá Matvælastofnun og lúti sem slík eftirliti stofnunarinnar. Ólafur M. Magnússon, framkvæmdastjóri mjólkurbúsins KÚ, sagði í fréttum í gær það vera blekkingar af hálfu MS að telja fyrirtækið afurðastöð en einungis afurðastöðvar eru undanþegnar ákveðnum ákvæðum samkeppnislaga.