KÚ kærir MS og KS

Mjólkurbúið KÚ hefur kært Mjólkursamsöluna (MS) og Kaupfélag Skagfirðinga (KS) til Samkeppniseftirlitsins fyrir brot á Samkeppnislögum. Þetta kemur fram í tilkynningu frá Mjólkurbúinu. Þar segir að talið sé að Mjólka ehf. hafi einnig tekið þátt í samráðinu eftir að KS keypti Mjólku árið 2009 auk þess sem Auðhumla, móðurfélag MS, kunni að vera viðriðin samráðið frá upphafi.

Krafist er að Samkeppniseftirlitið grípi þegar í stað til aðgerða því um sé að ræða samfelld brot sem staðið hafi yfir í langan tíma og beinist mikilvægum neysluvörum almennings.

Í kærunni, sem sjá má hér fyrir neðan, kemur fram að Mjólkursamsalan sé ekki undanþegin samkeppnislögum og að hún hafi ranglega verið skilgreind sem afurðastöð í skilningi búvörulaga. „Einungis afurðastöðvar eru undanþegnar ákvæðum samkeppnislaga um bann við samkeppnishamlandi samráði og samruna fyrirtækja,“ segir í kærunni.

Þá segir að til að teljast afurðastöð í skilningi búvörulaga þurfi viðkomandi aðili að taka við mjólk eða annarri búvöru beint frá framleiðanda. „Það gerir MS ekki, heldur er það Auðhumla móðurfyrirtæki MS sem annast alla innvigtun og söfnun mjólkur frá bændum og greiðir þeim fyrir hana.  MS hefur ekki keypt  dropa af mjólk af bændum frá því fyrirtækið var stofnað 2007, heldur kaupir MS mjólkina af afurðastöðinni Auðhumlu. Viðtækt samráð og samstarf MS við KS og fleiri aðila í mjólkuriðnaði á undanförnum árum stríðir því augljóslega gegn samkeppnislögum að mati lögmanna Mjólkurbúsins.“

Ólafur M. Magnússon, framkvæmdastjóri Mjólkurbúsins, segir forsvarsmenn MS hafa haldið öðru fram. „Ég tel það mjög alvarlegt að forsvarsmenn MS hafa með blekkingum haldið því fram að MS sé afurðastöð í skilningi búvörulaga og því undanþegin ákvæðum samkeppnislaga. Þessari blekkingu hefur verið haldið fram gangvart samkeppnisyfirvöldum og neytendum til að réttlæta brot fyrirtækisins á samkeppnislögum. Þessu verður að linna.“ segir Ólafur.

Í kæru lögmanna Mjólkurbúsins er bent á að einungis tveir aðilar hér á landi geti talist afurðastöðvar í skilningi búvörulaga en það eru Auðhumla svf. og Kaupfélag Skagfirðinga.  Það breyti engu þótt MS sé að 90,1% í eigu afurðastöðvarinnar Auðhumlu, réttindi eins lögaðila færist ekki til annars lögaðila þótt tengdir séu.

Nýlega sektaði Samkeppniseftirlitið MS um 370 milljónir króna fyrir að misnota markaðsráðandi stöðu sína með því að krefja Mjólkurbúið KÚ um hærra verð fyrir hrámjólk en aðra kaupendur. Því máli hefur MS áfrýjað til áfrýjunarnefndar samkeppnismála.