Menntamálaráðherra hæstánægður

Menntamálaráðherra fagnar niðurstöðu kjarasamninganna. Þeir auki sveigjanleika í framhaldsskólakerfinu og séu fyrsta skrefið í átt að styttingu framhaldsskólanáms. Allir séu að lokum sigurvegarar og þá sérstaklega nemendur.

Illugi Gunnarsson menntamálaráðherra lagði áherslu á það við gerð þessara kjarasamninga að fram næðust kerfisbreytingar í framhaldsskólunum og á grundvelli þeirra væri hægt að bæta kjör kennara. Hann segir að um sé að ræða tímamótasamning.

„Stór hluti hans snýr einmitt að kerfisbreytingu í framhaldsskólakerfinu og gerir okkur kleift að nútímavæða kerfið. Nýta betur tíma nemenda og þar með líka fjármuni og þannig rökstyðjum við þá hækkun sem kennararnir fá,“ segir menntamálaráðherra.

Launin hækki en á móti verði til betra skólakerfi. Kennsludögum fjölgi og skil milli kennslu- og prófatíma séu afnumin.

„En síðan er auðvitað gríðarlega stórt atriði  sem snýr að breytingum á vinnumati kennara. Það er reyndar þannig búið um það í þessu samkomulagi,   að fram þarf að fara samvinna á milli stjórnvalda og kennaranna sem á svo að ljúka með atkvæðagreiðslu kennara í febrúar,“ segir Illugi.

Þetta auki allan sveigjanleika í framhaldsskólakerfinu. Samningarnir feli í sér skref til styttingar á framhaldsnáminu.

„Við munum getað með þessum hætti haldið áfram að þróa námstímann til stúdentsprófs þannig að við förum að líkjast meira því sem gerist í löndunum í kring um okkur,“ segir hann.

Eru allir að vinna í þessu máli?

„Stærsti sigurvegarinn í þessu máli eru nemendur. Við munum fá betra skólakerfi með þessum breytingum og þar með er það þjóðin öll sem græðir. En vissulega gera þessir samningar okkur kleift að gera betur við kennarana. Kerfisbreytingarnar og þar með betri nýting á fjármunum standa þá undir þessum hækkunum,“ segir Illugi Gunnarsson menntamálaráðherra.