„Jón farsæll og góður borgarstjóri“

„Jón Gnarr hefur verið farsæll og mjög góður borgarstjóri,“ segir Dagur B. Eggertsson sem tók við sem borgarstjóri í dag. Meirihlutinn í borgarstjórn treystir sér ekki til að starfa með Framsókn og flugvallavinum sem fá ekki sæti í helstu ráðum og nefndum borgarinnar.

Dagur B. Eggertsson tók við borgarstjóraembættinu í dag af Jóni Gnarr sem setið hefur í embætti síðastliðin fjögur ár. Dagur verður 42ja ára gamall á fimmtudag og er 22. borgarstjóri í sögu Reykjavíkurborgar. Dagur kveðst taka stoltur við embættinu af Jóni Gnarr.

„Það er augljóst strax að Jón mun skilja eftir sig spor, ekki bara í borgarstjórn heldur í allri pólitíkinni. Hann hefur verið farsæll, friðsæll og mjóg góður borgarstjóri,“ segir Dagur B. Eggertsson.

Dagur og Jón hafa starfað náið saman síðastliðin fjögur ár. „Dagur sagði í sinni ræðu að hann hefði lært mikið af mér. Ég hef ekki lært síður mikið af honum. Þetta er búið að vera mjög ánægjulegt, krefjandi og lærdómsríkt tímabil,“ segir Jón Gnarr.

Meirihlutinn treystir ekki Framsókn

Fyrsti fundur borgarstjórnar fór fram í ráðhúsinu í dag og þar var kosið var í embætti, ráð og nefndir. Sóley Tómasdóttir var kjörin forseti borgarstjórnar og S. Björn Blöndal formaður borgarráðs. Framsókn og flugvallavinir fá ekki sæti í helstu ráðum og nefndum. Meirihlutinn gerði samkomulag við Sjálfstæðiflokkinn sem gerir það að verkum að Framsókn fær hvorki sæti í fimm manna nefndum né í stjórn fyrirtækja borgarinnar. Hvers vegna?

„Okkur þykir Framsóknarflokkurinn ekki hafa sýnt að hann sé stjórntækur,“ segir S. Björn Blöndal. „Það eru ákveðnir hlutir sem komu fram í þeirra kosningabaráttu sem samrýmast ekki grundvallar mannréttindum og hugmyndum um að fjölbreytileiki eigi að fá að njóta sín. Meðan að Framsóknarflokkurinn hefur ekki gert hreint fyrir sínum dyrum þá verður þetta svona.“

Sveinbjörg Birna Sveinbjörnsdóttir, oddviti Framsóknar og flugvallavina, segir í samtali við Morgunblaðið að þar með verði Framsókn eini flokkurinn í stjórnarandstöðu á kjörtímabilinu. Sjálfstæðisflokkurinn sé undir pilsfaldinum á meirihlutanum. Hún gefur lítið fyrir ummæli Björns um að flokkurinn sé óstjórntækur.

„Ummæli hans dæma sig sjálf,“ segir Sveinbjörg. „Við ræddum við Sjálfstæðisflokkinn um hvort við myndum setja saman minnihlutalista og niðurstaðan var að gera það ekki. Við vinnum eftir því sem að við höfum úr að spila.“