Sveinbjörg Birna hætt á Facebook: „Fullt af leiðinlegum og ógeðslegum hlutum sem ég vildi ekki sjá“

Það hefur vakið nokkra athygli að Sveinbjörg Birna Sveinbjörnsdóttir, oddviti borgarstjórnarflokks Framsóknarflokksins, lokaði Facebooksíðu sinni strax eftir sveitarstjórnarkosningar. Hún segist hafa verið ósátt við ýmislegt sem sagt var þar og ákvað því að loka henni.

„Já, ég ákvað að loka síðunni deginum eftir kosningar. Þá sendi ég kveðju til vina minna á Facebook og tilkynnti ég þeim þetta, ég sagði þeim að ég ætlaði að taka mér frí í sumar. Þetta var bara mín persónulega ákvörðun. Það er fullt af öðrum hlutum en Facebook, sem ég þarf að einbeita mér að.“ Sveinbjörg segir þó aðra ástæðu einnig liggja þar að baki:

„Ég hafði ekki verið dugleg að skoða síðuna mína í aðdraganda kosninganna. Ég kíkti alveg á Facebook og þá á „newsfeedið“ mitt. En ég var ekki dugleg að kíkja á síðuna sjálfa. Svo þegar ég kíkti þar inn sá ég fullt af leiðinlegum og ógeðslegum hlutum sem ég vildi ekki sjá. Þannig að ég brá á þetta ráð.“

Sveinbjörg vill ekki fara nánar út í þá sálma hvað það var sem leiddi til þessarar ákvörðunar en bæði hefur því verið fleygt að Facebooksíðu sinni hafi hún lokað vegna þess að þar var orðinn áberandi stuðningur við hana meðal þeirra sem sem vilja gjalda varhug við því að hingað til lands flytji þeir sem eru Islam-trúar og einnig hafa Framsóknarmenn kvartað undan umræðunni í þjóðfélaginu og talið hana snúast gegn sér.

Hatursfullir póstar

Mikið líf var á Facebook-síðu oddvitans í aðdraganda kosninganna. Vísir sagði frá því þegar Sveinbjörg Birna sakaði Láru Hönnu Einarsdóttur um einelti í sinn garð, eftir  að Lára Hanna hafi skilið eftir skilaboð á síðu Sveinbjargar um að hún myndi vera gagnrýnin á flokk hennar. 

„Þrátt fyrir mikinn áhuga þinn á Framsókn þá eru póstar þínir á vegginn hjá mér ekkert annað en einelti og jaðrar við ofbeldi og algerlega ómálefnalegir. Ég hef því ákveðið að taka þig út af vinalistanum. Vona að lífið verði þér ánægjulegt án þess að hafa mig á vinalistanum þínum,“ var svar Sveinbjargar Birnu.

Kveikjan að moskumálinu

Þekktasta Facebook-færsla Sveinbjargar Birnu var líklega sú sem varð kveikjan að moskumálinu svokallaða. Þann 22. maí ritaði hún þessi orð á síðuna sína:

„Margir hafa komið að máli við mig og spurt mig hver sé afstaða mín til úthlutunar á lóð undir Mosku í Reykjavík... mjög margir.“ 

Færslan vakti nokkra athygli og skiptust Facebook-vinir hennar á skoðunum í þessu máli. Blaðamaður Vísis hringdi í kjölfarið í Sveinbjörgu Birnu og lýsti hún því þá yfir að hún vildi að borgin drægi aftur lóðaúthlutun til Félags múslima á Íslandi.