Alvitað leyndarmál

Leikarinn Victor Garber staðfesti í viðtali við bloggarann Greg Hernandez að hann væri samkynhneigður. Hann sagði kynhneigð sína ekki vera neitt leyndarmál, enda hefði hann verið í sambúð með kærasta sínum, listamanninum Rainer Andreesen, í þrettán ár.

„Ég tala ekki um þetta en allir vita af því. Rainer verður viðstaddur SAG Awards með mér. Við höfum verið saman í næstum þrettán ár og búum í Greenwich Village. Við elskum báðir New York,“ sagði Garber.

Leikarinn kanadíski er hvað þekktastur fyrir hlutverk sitt í spennuþáttunum Alias þar sem hann lék á móti Jennifer Garner. Hann hefur einnig leikið í myndum á borð við Argo, Legally Blonde, Milk, The First Wives Club og Sleepless in Seattle.