Innlent

Þyrla sækir slasaðan vélsleðamann

Björgunarsveitir af Norðurlandi eru nú á leið í Unadal fyrir ofan Hofsós þar sem vélsleðamaður slasaðist fyrir um hálfri stundu. Ók hann fram af hengju og fékk sleðann yfir sig.

Maðurinn, sem er töluvert slasaður, var í æfingaferð sleðaflokka tveggja björgunarsveita í Skagafirði.

Þyrla Landhelgisgæslunnar hefur verið kölluð út og einnig er læknir á leið á staðinn á vélsleða en hann mun undirbúa manninn fyrir flutning á sjúkrahús.

Uppfært kl. 18:15:

Þyrla Landhelgisgæslunnar var kölluð út kl. 16:05 í dag eftir að tilkynning barst um vélsleðaslys í Unadal í Skagafirði. Ók maðurinn fram af hengju og fékk sleðann ofaná sig. Björgunarsveitir á svæðinu voru þá á leið á staðinn auk læknis á vélsleða.

Þyrlan fór í loftið kl. 16:30 og lenti við slysstað kl. 17:33. Hafði þá læknir búið um meiðsli hins slasaða og var rétt fyrir kl. 18:00 verið að flytja manninn um borð í þyrluna. Gert er ráð fyrir að flogið verði með hann á Landspítalann í Fossvogi. 

 

Mest lesið


Fleiri fréttir

Sjá meira


×

Mest lesið