Upplýsingar sem er erfitt að meta til fjár

Konur til athafna er nýtt námskeið þar sem metsöluhöfundurinn og framkvæmdastjóri Gyðju Collection, Sigrún Lilja Guðjónsdóttir, oftast kennd við Gyðju, kennir hagnýtar aðferðir í markaðssetningu, sölu og framleiðslu á vörum og þjónustu.

Námskeiðið svar við fyrirspurnum

Markmiðið með námskeiðinu er að auka þekkingu og hæfni þátttakenda við að framleiða, selja og markaðssetja vörur sínar og þjónustu hvort sem viðskiptahugmyndirnar eru á algjöru frumstigi eða þegar byrjaðar í rekstri.

„Ég fæ orðið margar fyrirspurnum frá konum sem hafa hug á að hefja framleiðslu og sölu á vörum og óska eftir að fá aðstoð mína og ráðleggingar í þeim efnum. Ég setti því saman hnitmiðað helgarnámskeið þar sem ég mun fara vel yfir „trikkin" í framleiðslu, sölu og markaðssetningu og miðla minni reynslu sem ég hef fengið við uppbygginguna á Gyðju."

Að auki mun Sigrún Lilja kenna persónulega markmiðasetningu, framkomu, fundarstjórn og leiðir til að byggja upp sjálfstraust en það telur hún nauðsynlegan þátt til að ná árangri.

Með áralanga reynslu

Sigrún hefur langa reynslu af framleiðslu, allt frá því að hún starfaði í fjölskyldufyrirtækinu Tanna auglýsingavörum og svo núna eftir að hún hóf rekstur sjálf. „Ég veit orðið sitt lítið af hverju um það hvernig best er að finna framleiðendur og eiga við þá góð samskipti svo að framleiðsluferlið gangi vel fyrir sig. „Með námskeiðinu vil ég hjálpa konum að koma í veg fyrir að þær eyði nokkrum árum í að reka sig á eins og gengur og gerist í raunveruleikanum."

Strákarnir líka áhugasamir

Sigrún segir að það hefði hjálpað sér mikið á sínum tíma að fá allar þær upplýsingar sem hún ætlar nú að miðla til annarra á silfurfati. „Þetta eru upplýsingar sem er erfitt að meta til fjár og ég geri mér grein fyrir því en mig langar að leggja mitt af mörkum við að virkja og aðstoða hugmyndaríkar og sniðugar konur og koma þeim af stað."

Eftir að Sigrún setti upp Facebook-síðu fyrir námskeiðið, facebook.com/konurtilathafna, fékk hún fjöldann allan af áskorunum frá herramönnum sem langar til að koma á námskeiðið. „Ég hef því líka sett upp forskráningu á annað námskeið fyrir bæði kynin sem ég stefni á að halda á næstu mánuðum," segir Sigrún Lilja að lokum. Námskeiðið Konur til athafna fer fram helgina 9.-10. febrúar næstkomandi.

Skráning og allar nánari upplýsingar fara fram á Facebook-síðu námskeiðsins, Konur til athafna.