Nóg að gera hjá lögreglu

Í skýrslu lögreglunnar á höfuðborgarsvæðinu segir að vaktin hafi verið mjög erilsöm. Tilkynnt var um fimm líkamsárásir í miðbænum. Gerendur í tveimur málum náðust og gista nú fangageymslur lögreglu, þeir verða yfirheyrðir síðar í dag. Þá voru sex ökumenn teknir grunaðir um ölvun við akstur, fjórum ökumönnum var sleppt að lokinni skýrslutöku og töku blóðsýnis en einn gistir fangageymslu þar sem hann ók bifreið sinni útaf og verður hann yfirheyrður síðar í dag. Kl. 23:59 voru tveir aðilar teknir í Hörpu fyrir þjófnað, en þeir höfðu tekið áfengi þar ófrjálsri hendi. Mennirnir eru erlendir ferðamenn, þeim var boðið að ganga frá sínum málum á vettvangi en þeir neituðu því og voru því vistaðir í fangageymslu. Rétt fyrir klukkan fimm í morgun var síðan einkennishúfa slegin af lögreglumanni sem var við störf í miðbænum. Húfan náðist en þegar verið var að ræða við geranda málsins hópaðist fólk að og lét ófriðlega. Gerandi var fluttur á lögreglustöðina þar sem hann hélt uppteknum hætti þegar ræða átti við hann og veittist hann aftur að lögreglumanni og sló af honum einkennishúfuna. Maðurinn var því vistaður í fangageymslu og verður yfirheyrður síðar í dag.