Vill aukið eftirlit með ólöglegri steranotkun

Lyfjaeftirlit Íþrótta- og Ólympíusambands Íslands, (ÍSÍ), hefur ekki heimild til að sinna eftirliti með notkun ólöglegra stera inni á líkamsræktarstöðvum.

Notkun stera hér á landi hefur aukist til muna á síðustu árum. Samkvæmt heimildum Fréttablaðsins er lyfjanotkun á meðal þjálfara víðtækt vandamál og auðvelt er að nálgast stera til kaups inni á líkamsræktarstöðvum.

„Okkar yfirráð er bara með þeim íþróttagreinum sem falla undir sambandið. Það á sömuleiðis við okkar fræðslustarf, þannig að okkar fræðslu- og forvarnarstarf miðast við þá iðkendur sem þar eru. Við höfum hins vegar haft mjög miklar áhyggjur af ástandinu," segir Skúli Skúlason, formaður lyfjaráðs ÍSÍ.

Sambandið hafi ekki aðgang að líkamsræktarstöðvum og því geti starfsmenn þess ekki stundað eftirlit eða fræðslu inni á þeim.

Skúli segir að litið sé sérstaklega til Danmerkur og Noregs sem fyrirmyndir hvað varðar eftirlit með ólöglegri steraneyslu en þar eru líkamsræktarstöðvar skyldaðar til að merkja hvort þær séu með lyfjaeftirlit eða ekki. Einnig skrifa viðskiptavinir undir samning við kaup á líkamsræktarkorti þar sem þeir samþykkja að gangast undir lyfjapróf ef grunur kemur upp um misnotkun lyfja. Auk þess verða allir starfsmenn að samþykkja óundirbúin lyfjapróf.

„Þetta kerfi höfum við mjög mikinn áhuga á að taka upp. Aðalvandamálið er að kostnaðurinn við þetta fellur þá á stöðvarnar og þær kannski bera það fyrir sig að þetta sé mjög dýrt. Danirnir hafa sett þetta mjög skemmtilega upp og þetta hefur aukið aðsóknina hjá þeim stöðvum sem eru með eftirlit."

Að sögn Skúla er búið að vinna grunnvinnu varðandi það að breyta núverandi skipulagi úr því að lyfjaeftirlitið sé stofnun undir ÍSÍ í það að vera sjálfstæð stofnun með skipaða stjórn frá ÍSÍ og menntamálaráðuneytinu á sama hátt og er í Danmörku og Noregi. Það er von Skúla að hún verði komin á laggirnar fyrir árslok. „Það myndi veita okkur meiri möguleika á að vinna með líkamsræktarstöðvunum en einnig með tollinum, fangelsunum og lögreglunni í að stunda forvarnarstarf og sinna eftirliti úti í samfélaginu."