Hver er þessi Conny?

Þýska „krautrokkið“ sem kom fram á áttunda áratugnum lifir góðu lífi á meðal tónlistaráhugamanna í dag. Það má heyra áhrif frá því hjá mörgum tónlistarmönnum af yngri kynslóðinni og frumkvöðlarnir njóta enn mikillar virðingar. Á meðal eftirminnilegustu tónleika síðasta árs á Íslandi voru t.d. tónleikar Damos Suzuki, fyrrum söngvara Can, í Gamla bíói og mikil eftirvænting ríkir fyrir komu Kraftwerk á Airwaves 2013.

Kraftwerk og Damo Suzuki eiga það sameiginlegt að hafa unnið undir upptökustjórn Connys Plank, en hann er oft nefndur sem einn helsti áhrifavaldur krautrokksins. Konrad Plank var fæddur 3. maí 1940. Hann hóf ferilinn sem hljóðmaður hjá Marlene Dietrich en í lok sjöunda áratugarins byrjaði hann að vinna sem upptökustjóri. Hann var einn af frumkvöðlunum í því að nota hljóðverið á skapandi hátt. Hann notaði möguleika fjölrásakerfisins til hins ýtrasta og bjó til stemningu í tónlistinni með elektrónískum hljóðmyndum.

Plank tók m.a. upp fyrstu fjórar plötur Kraftwerk, allar plötur Neu!, plötur Cluster og DAF. Upp úr 1980 varð hann mjög eftirsóttur og hljóðritaði þá m.a. Eurythmics, Ultravox og Killing Joke svo nokkur dæmi séu tekin. Conny Plank lést úr krabbameini árið 1987, 47 ára að aldri.

Fyrir mánuði kom út nýtt safn tileinkað minningu Connys Plank. Það heitir Who‘s That Man – A Tribute To Conny Plank. Þetta eru fjórir diskar. Á þeim tveimur fyrstu er safn laga sem Conny átti þátt í að taka upp, á þeim þriðja eru nýjar endurgerðir og á fjórða disknum er tónleikaupptaka frá 1986 með Conny, Dieter Möbius og Arno Steffen. Þetta er vegleg og flott útgáfa sem hægt er að mæla með.