Eyþóri kastað í ískaldan sjóinn og stóð sig eins og hetja

„Ég hef aldrei séð neinn jafn þreyttan og Eyþór Inga á þriðjudagskvöldið, enda vorum við þá búin að vera að í yfir 20 tíma samfleytt og hann búinn að verja stórum hluta þess tíma í vatni,“ segir Guðmundur Þór Kárason, leikstjóri tónlistarmyndbands Eurovision-lagsins Ég á líf og einn eigandi framleiðslufyrirtækisins Purkur, sem annast gerð þess í samstarfi við Pipar/TBWA.

Eins og fram hefur komið gerist myndbandið á hafi úti og ver Eyþór Ingi stórum hluta þess í vatninu sjálfu. „Við köstuðum honum út í 2ja gráðu heitan sjóinn þegar hitastigið úti var mínus fjórar gráður. Það voru þrír björgunarsveitamenn viðstaddir og tilbúnir að grípa inn í ef þess þyrfti. Þetta gekk þó allt lygilega vel,“ segir Guðmundur.

Guðmundur Þór segir marga hafa lagt lóð á vogarskálarnar við gerð myndbandsins. „Það gáfu sig allir 200 prósent í þetta og metnaðurinn var svo mikill að jafnvel þegar ég var búinn að samþykkja tökuna vildu Eyþór og Hákon tökumaður stundum taka hana aftur til að ná henni alveg fullkominni,“ segir hann. „Mér líður eins og ég hafi ekki gert neitt. Ég stóð bara þarna í dúnúlpu og sagði fólki fyrir verkum,“ bætir hann við hlæjandi.

Myndbandið er að sögn Guðmundar angurvært og gleðilegt í bland. „Það er svolítið dramatískt en ég lagði upp með að hafa það ekki of væmið. Svo var þetta auðvitað kolvæmið þegar upp var staðið,“ segir hann og hlær. Myndbandið verður frumsýnt í hádeginu á morgun á heimasíðu Vodafone.