Læknafeðgar spila saman í fyrsta sinn

Feðgarnir Haukur Heiðar Hauksson úr hljómsveitinni Diktu og Haukur Heiðar Ingólfsson spila saman á læknatónleikum á Rósenberg annað kvöld. Þetta verður í fyrsta sinn sem þeir spila saman opinberlega.

„Það er ótrúlega gaman að vinna með pabba. Hann er búinn að gera músík í 300 ár og það er gaman að komast inn í allt annan vinkil á músík en maður hefur verið í sjálfur, þessu rokk-poppdæmi, á meðan hann er í rólegri og ljúfri tónlist," segir Haukur Heiðar yngri.

Pabbi hans hefur spilað undir hjá Ómari Ragnarssyni í fjölda ára og gefið út sex plötur. Sú síðasta, Á rómantískum nótum, kom út fyrir jól og þar söng sonur hans einmitt eitt lag. „Hann er að mínu mati með rödd sem hentar ágætlega í þá músík sem ég hef mest spilað," segir Haukur Heiðar eldri. „Ég hef áhuga á þessari amerísku söngbók; Frank Sinatra, Dean Martin og þessum köppum. Hann [Haukur yngri] hefur rödd sem mér finnst falla vel inn í svona ballöður."

Haukur Heiðar yngri hlakkar mikið til að stíga á svið með föður sínum en beiðni um að þeir træðu upp saman kom fram á fyrstu læknatónleikunum í nýrri tónleikaröð sem voru haldnir á Rósenberg í fyrra. Þá var faðir hans staddur í útlöndum. Haukur Heiðar kom þá einn fram með kassagítarinn og spilaði meðal annars lag sem hann hafði samið samdægurs. „Það var virkilega gaman og fullt hús," segir hann og bætir við að á tónleikunum á fimmtudaginn muni hann syngja við undirleik föður síns. „Við ætlum að taka eitt lag með Diktu og svo standarda sem hann hefur verið að spila."