Gæti keppt í Ungfrú heimi fyrir Filippseyjar

"Sigurvegarinn gæti endað á því að taka þátt í keppninni um Ungfrú heim fyrir hönd Filippseyja, svo það er mikið í húfi," segir fyrirsætan Ásdís Lísa Karlsdóttir. Hún heldur til Noregs í byrjun næsta mánaðar til að taka þátt í keppninni Ungfrú Filippseyjar í Skandinavíu.

Þetta er í fyrsta sinn sem íslensk stúlka tekur þátt í keppninni, sem er fyrir skandinavískar stelpur af filippseyskum uppruna. Þrettán þátttakendur eru skráðir til leiks í ár en sigurvegarinn fer áfram í Ungfrú Filippseyjar og gæti því á endanum tekið þátt í keppninni um Ungfrú heim. Svipaðar keppnir eru meðal annars haldnar í Bandaríkjunum og Bretlandi.

Ásdís Lísa hefur búið á Íslandi alla tíð en móðir hennar er frá Filippseyjum og faðir hennar er íslenskur. "Mamma og pabbi búa í Noregi. Þau fréttu af keppninni þar og ég sendi tölvupóst til að spyrjast fyrir um hana. Ég spáði svo ekkert meira í þetta fyrr en núna í byrjun janúar þegar aðstandendur filippseyska samfélagsins á Íslandi höfðu samband við mig. Þau höfðu heyrt að ég hefði áhuga á að taka þátt," segir hún.

Þetta verður í fyrsta skipti sem Ásdís Lísa tekur þátt í fegurðarsamkepni, þótt henni hafi nokkrum sinnum staðið það til boða hér heima á Íslandi. "Mér hefur aldrei þótt það spennandi áður og frekar viljað einbeita mér að fyrirsætubransanum," segir hún, en fyrirsætuferill hennar hófst þegar hún var tólf ára gömul.

Ásdís útskrifaðist með stúdentspróf síðastliðið vor og starfar nú í Bláa lóninu. "Ég kláraði stúdentinn ári fyrr því ég var í Hraðbraut í tvö ár. Svo átti ég smotterí eftir og fór í Fjölbrautaskólann í Breiðholti síðasta árið," segir hún.

Þó að Ásdís Lísa sé að stíga sín fyrstu skref í heimi fegurðarsamkeppna getur hún treyst á leiðsögn frá kærastanum sínum, Ólafi Geir Jónssyni, sem var krýndur Herra Ísland árið 2005. Hann var síðar sviptur titlinum en hefur þó ekki ráðið kærustunni frá því að feta þessa slóð.

"Hann styður mig alveg í því sem ég vil gera," segir hún og hlær.