Skosk hátíð á Kexinu

Hin árlega skoska menningarhátíð Burns Night verður haldin á Kex Hostel í annað sinn helgina 24. til 26. janúar í samstarfi við Vífilfell og Icelandair. Burns-nótt er haldin ár hvert á afmælisdegi þjóðskáldsins Robert Burns og er fagnað með skoskum mat, drykk, tónlist og að sjálfsögðu ljóðlist Roberts Burns. Kex Hostel hefur í samstarfi við Benna Hemm Hemm boðið skosku tónlistarmönnunum Alasdair Roberts og Bill Wells ásamt hljómsveit til Íslands, auk sekkjapípuleikarans Barnabys Brown. Munu þeir sjá um að haldið sé fast í hefðir á Burns-nótt og allt fari fram í samræmi við lög og reglur. Tvær vinnustofur verða einnig haldnar í tengslum við heimsókn skosku listamannanna.