Ásakanir um skemmdarverk ganga á víxl

Ásakanir um skemmdarverk í stjórnarskrármálinu gengu á víxl milli þingmanna á Alþingi í dag og kallaði Þór Saari þingmaður Hreyfingarinnar Árna Pál Árnason afturgenginn Davíð Oddsson fyrir að hafa lagt fram breytingartillögu ásamt formönnum Vinstri grænna og Bjartar framtíðar.

Í dag eru 40 dagskrármál á Alþingi, í óundirbúnum fyrirspurnum mátti heyra að stjórnarskrármálið nýtur helst athygli margra þingmanna en um það ríkir engin sátt.

Sé stuttlega farið yfir sögu þá lögðu formennirnir þrír, þau Árni Páll Árnason, formaður Samfylkingarinnar, Katrín Jakobsdóttir, formaður Vinstri grænna og Guðmundur Steingrímsson, formaður Bjartrar framtíðar, fram frumvarp til breytinga á stjórnskipunarlögum. Þau leggja til að á þessu þingi verði samþykkt ákvæði um hvernig stjórnarskrá skuli breytt.

Í gær lögðu svo Oddný Harðardóttir og Skúli Helgason þingmenn Samfylkingarinnar og Álfheiður Ingadóttir og Árni Þór Sigurðsson, þingmenn Vinstri grænna, fram nýja breytingartillögu við frumvarp formannanna þriggja. Sú tillaga felur í sér að auðlindarákvæði stjórnarskrárinnar verði breytt áður en þingi lýkur.

Og svo hefur Margrét Tryggvadóttir, þingmaður Hreyfingarinnar, lagt fram breytingartillögu við frumvarp formannanna þriggja en breytingartillaga hennar veldur því að greiða þarf atkvæði um frumvarp um stjórnarskránna í heild sinni, eins og það kom frá Stjórnskipunar- og eftirlitsnefnd.

Árni Páll Árnason gagnrýndi frumvarp hennar í fréttum okkar í gær og sagði að með þessu hefði málamiðlunartillga sem ætlað var að skapa sátt einnig verið töluð í kaf.

Magnús Orri Schram, þingmaður Samfylkingarinnar, gagnrýndi breytingartillögu Margrétar Tryggvadóttur og sagði ómögulegt að samþykkja nýja stjórnarskrá í formi breytingartillögu án lögskýringa.

"Það er mín skoðun að breytingartillaga háttvirts þingmanns Margrétar Tryggvadóttur hafi ekki gert neitt annað en að spilla því ferli sem var verið að reyna ná sátt um. Það er að tryggja áframhaldandi vinnu við stjórnarskrá Íslands. Háttvirtur þingmaður, Margrét Tryggvadóttir, getur ekki ætlast til þess að háttvirtur þingheimur samþykki stjórnarskrá Íslands sem breytignartillögu án greinargerðar, án allra lögskýringa. Það er í raun og veru óvirðing við stjórnarskrá Íslands að fara fram með þeim hætti."



Þór Saari, þingmaður Hreyfingarinnar, sagði þingstörf í uppnámi og gaf lítið fyrir tillögu formannanna þriggja sem hann kallaði svokallaða sáttartillögu.

„Við erum hér að ræða eitthvað sem menn kalla sáttartillögu, sem engin sátt ríkir um og er einfaldlega krafa formanns Samfylkingarinnar, Árna Páls Árnasonar um lúkningu á mikilvægasta máli kjörtímabilsins, máli sem yfirgnæfandi meirihluti í þjóðaratkvæðagreiðslu vill klára en lítill hópur fólks hér á þingi er búinn að stöðva."

„Þetta er sérkennilega staða svo ekki sé meira sagt. Það er furðulegt að horfa upp á þennan stjórnarmeirihluta hvernig hann hefur lúffað algjörlega fyrir þeirri kröfu formanns Samfylkingarinnar. Það er engu líkara en hér sé í þinginu afturgenginn Davíð Oddsson sem formaður Samfylkingarinnar," sagði Þór.