Sjómenn án kjarasamninga í þrjú ár

 Kjarasamningar sjómanna og útvegsmanna hafa verið lausir í tæp þrjú ár og mikið virðist bera í milli svo menn komist að samkomulagi um gerð nýs kjarasamnings.

Deilan snýst að stærstu leiti um hvort að það eigi að breyta aflahlutaskiptakerfinu.

„Eins og málin standa má að meðaltali gera ráð fyrir að sjómenn fái í kringum 40 prósent af aflaverðmæti. Ljóst má vera að taka verður tillit til þess aukna kostnaðar sem stóraukið veiðigjald og síhækkandi olíukostnaður hefur falið í sér og lent allur á útgerðarhliðina við hlutaskiptin,“ sagði Adolf Guðmundsson formaður Landssambands íslenskra útvegsmanna á aðalfundi samtakanna.

„Það er ekki inn í myndinni að hlutaskiptakerfinu verði breytt í þá veru að við förum að borga fyrir þá auðlindagjald og eitthvað slíkt. Auðlindagjaldið er lagt á hagnað útgerðar og þeir geta borgað það sjálfir. Við ætlum ekki að borga fyrir þá,“ segir Sævar Gunnarsson formaður Sjómannasambands Íslands.

Adolf segir á hinn bóginn að þangað til þessi mál verða óútkljáð verði kjaramál sjómanna í óvissu.

Kerfið sem kjarasamningarnir byggi á sé að útgerðarmenn og sjómenn deili kjörum í gegnum hlutaskipti. Með því séu hagsmunir sjómanna og útgerðar tengdir hvað varðar afkomu af veiðum einstakra skipa.

„Sú hugsun að hagsmunir útvegsmanna og sjómanna haldist í hendur hefur að miklu leyti tapast og það þarf að leiðrétta,“ segir hann ennfremur.

„Við erum með samninga um hlutaskipti og þar gert ráð fyrir að við tökum þátt í kostnaði útgerðarinnar. En það er ljóst að við ætlum ekki að taka meiri kostnað á okkur en við berum í dag. Það vita útvegsmenn og það er ástæðan fyrir því að ekki hefur tekist að semja í þrjú ár,“ segir Sævar.

Fyrir einu og hálfu ári vísuðu útvegsmenn deilunni til Ríkissáttasemjara. Menn hafa fundað nokkuð oft hjá sáttasemjara án þess að samningsflötur hafi fundist. Sjómenn segja að það sé útilokað að þeir fari í einhverjar aðgerðir til að ná fram nýjum kjarasamningi. 

„Við förum ekki í átök við þá til að ná fram kröfum þeirra. Það er alveg ljóst,“ segir Sævar.

Hann segir að menn séu alveg rólegir því það sé sameiginlegur skilningur deilenda að sá kjarasamningur sem fallinn er úr gildi haldi utan um réttindamál sjómanna. 

Nýr sáttafundur hefur ekki verið boðaður hjá sáttasemjara en samkvæmt heimildum fréttastofu líður að því að boðað verði til hans.