10. bekkingar kynntu sér mörkin milli kynlífs og ofbeldis

Óhætt er að segja að tíundu bekkingar í Háteigsskóla hafi horft á stuttmyndina „Fáðu já!" af mikilli athygli og haft gaman af í dag.

Myndin, sem meðal annars á að skýra mörkin milli kynlífs og ofbeldis auk þess að vega upp á móti áhrifum kláms og klámvæðingar, var sýnd 10. bekkingum í grunnskólum landsins í hádeginu í dag. Undirritaður brá sér í heimsókn í Háteigsskóla þar sem nemendur biðu spenntir eftir sýningu myndarinnar.

„Eruði ekki spenntar?" spurði Erla Súsanna Þórisdóttir, umsjónarkennari í 10. bekk. Stelpurnar svöruðu játandi um hæl og eftirvæntingin meðal stelpnanna var greinileg.

Tveir bekkir eru í hverjum árgangi í Háteigsskóla og ákváðu kennarar að best væri að sameina strákana í einni stofu og stelpurnar í annarri. Að sögn Erlu Súsönnu hefur það reynst vel þegar unnið hefur verið með álíka viðfangsefni.

„Við höfum áður unnið með svipuð málefni og höfum þá kynjaskipt þeim. Það hefur gengið miklu betur. Þeim líður betur og eru líklegri til þess að tjá sig," segir Erla Súsanna.

Athygli hvers einasta nemanda var óskipt og aðeins stöku sinnum sem einhver heyrðist hvísla í eyra sessunautar. Annars voru augun galopin og áhuginn greinilega mikill.

„Ég var líka búin að sýna krökkunum myndbrot úr henni og þau voru rosalega áhugasöm. Biðu spennt eftir að sjá hana. Mér fannst hún hitta í mark," segir Erla Súsanna. Athyglin var ekki síður mikil þegar blaðamaður brá sér í stofuna þar sem strákarnir í tíunda bekk fylgdust með.

Það vakti athygli og aðdáun undirritaðs og ljósmyndara Fréttablaðsins hve þroskaðir nemendurnir í 10. bekk í Háteigsskóla virtust vera. Ekkert varð vart við fliss, hróp eða frammíköll á meðan á myndinni stóð. Hluta af ástæðunni má væntanlega einnig rekja til myndarinnar sem hitti í mark hjá markhóp hennar.

Erla Súsanna hafði verið vöruð við því að myndin væri svolítið gróf og sýndi ansi mikið.

„Ég var kannski sammála því að vissu leyti en þetta er bara veruleikinn sem krakkarnir búa við, þ.e. þetta er það sem þau sjá á netinu og allt í kringum okkur. Ég held að þeim hafi ekki fundist hún of gróf eða eitthvað slíkt," segir Erla Súsanna og nemendur hennar tóku undir það í samtali við blaðamann að sýningu lokinni.

Þegar um 15 mínútur voru liðnar af myndinni, sem er um 20 mínútna löng, kom upp bilun í spilaranum. Gerðist það líka hjá strákunum og óhætt að segja að nemendurnir hafi orðið ansi svekktir þegar óvissa ríkti hvort hægt yrði að klára myndina. Það hófst þá nokkrum mínútum síðar en töfin varð til þess að engin tími skapaðist fyrir umræðu að myndinni lokinni.

Erla Súsanna segir það miður að ekki hafi verið hægt að fylgja myndinni eftir með umræðu. Það verði engu að síður gert við fyrsta tækifæri.

„Ég held að það sé nauðsynlegt. En eins og kom fram hjá stelpunum eftir myndina þá fannst þeim myndin svara mörgum spurningum. Það segir ansi mikið um myndina. Engu að síður ætlum við að fara yfir hana," segir Erla Súsanna. Hún segir myndina frábæra til þess að nálgast umræðuefni með nemendum sínum sem geti verið viðkvæmt.

„Algjörlega, alveg tvímælalaust. Þetta er okkar miðill til að ná til þeirra. Stuttmyndir og eitthvað sjónrænt. Það er besta leiðin til að ná til þeirra, vekja upp spurningar og vinna með."

Rætt var við nemendur í tíunda bekk að sýningu myndarinnar lokinni. Viðtölin birtast hér á Vísi síðar í dag.

Myndin er öllum aðgengileg á heimasíðu hennar. Myndinni er skipt upp í sex kafla: #Upphaf, #Klám, #Nauðgun, #Að setja mörk, #Ofbeldi og #Fáðu Já. Smelltu hér til að horfa á myndina.