Endurvakti pönkarann í sjálfum sér

„Maður verður að hafa smá pönk í sér. Þetta er partur af því,“ segir Ómar Eyþórsson, útvarpsmaður á X-inu.

Hann ákvað að breyta nafninu sínu í Ómar Úlfur eftir að hafa lesið bókina Sjóræningjann eftir Jón Gnarr og hlustað á pönksveitina Þeyr.

„Ég uppgötvaði eftir að ég las bókina að ég væri svolítið búinn að vanrækja pönkarann í sjálfum mér,“ segir Ómar. „Svo var ég um helgina að hlusta á Þeysarana, þar á meðal lagið Úlf, og mundi allt í einu eftir því að ég hef alltaf fílað þetta nafn og var einu sinni að spá í að breyta um nafn á mínum yngri og villtari árum.“

Í kjölfarið á þessari pönk-uppljómun sinni ákvað Ómar að drífa sig í Þjóðskrá og breytti nafninu og lét hvorki kóng né prest vita. „Þetta er meira táknræns eðlis. Ég ætla ekki að biðja fólk að sleppa því að kalla mig Ómar og byrja að kalla mig Úlf. En ég hef alltaf fílað þetta nafn eftir að ég las um Kveldúlf í Egilssögu. Þetta er íslenskt og ég er dökkur yfirlitum og úlfslegur, þannig að þetta hentaði bara vel.“

Aðspurður hvað fjölskyldu og vinum finnst um uppátækið segir Ómar Úlfur að konan hans hafi ekki verið sérlega hrifin. „Hún var reyndar rosalega þreytt og búin að vera að læra mikið. Ég hef nú ekki sagt mömmu þetta enn þá. Það er pönkið í þessu, þetta er bara fyrir mig.“