Ef ég hefði ekki farið í tékk þá hefði ég hugsanlega komist að þessu allt of seint

Guðrún Hólmfríður Ólafsdóttir, 26 ára, hefur starfað hjá World Class frá árinu 2007. Hún stundar nú íþróttafræði í Háskólanum í Reykjavík. Guðrún féllst á að ræða við okkur um veikindi sín því hún vill koma þeim skilaboðum til ungra kvenna að fara í krabbameinsskoðun og láta fylgjast með sér.

Allt of margar fara ekki í krabbameinsskoðun

"Það eru alltof margar stelpur í kringum mig sem hafa aldrei farið í krabbameinsskoðun en ég greindist með frumubreytingar í fyrsta sinn sem ég fór og nú seinast var ég komin með leghálskrabbamein. Konur virðast almennt ekki vera mjög meðvitaðar um hvað þetta reglubundna tékk getur skipt sköpum."

Fékk þær fréttir að þetta var orðið að leghálskrabbameini

Hvernig komst þú að því að þú ert með krabbamein? "Í haust fór ég í reglubundið eftirlit hjá kvensjúkdómalækni. Það fundust hjá mér frumubreytingar og ég fór í keiluskurð í desember. Í janúar fæ ég þær fréttir að þetta var orðið að leghálskrabbameini. Sem betur fer náðu þeir að fjarlægja allt meinið strax en þar sem þetta var komið á þetta stig þarf að fjarlægja leghálsinn og einhverja eitla þar í kring. Eitlarnir verða svo skoðaðir betur en ekki er reiknað með því að ég þurfi á áframhaldandi meðferð eftir þetta. Ef þetta hefði verið orðið aðeins stærra hefði þurft að taka allt legið."

Engar aukaverkanir

"Ég fann ekki fyrir neinu og ef ég hefði ekki farið í tékk þá hefði ég hugsanlega komist að þessu allt of seint," bætir hún við.

Fjölskyldan styður Guðrúnu

Áttu góða að sem hjálpa þér í gegnum veikindin? "Ég á góða fjölskyldu sem stendur með mér í þessu öllu saman sem er ómetanlegt. "

Á leiðinni til Noregs í aðgerð

Hvar fer aðgerðin fram og hvenær? "Aðgerðin verður framkvæmd í Osló. Vonandi er það endapunkturinn á þessu ferli hjá mér en það er ekki er reiknað með að ég þurfi á áframhaldandi meðferð eftir það."

Hvetur allar konur að panta sér tíma

"Eftir að ég komst að þessu hef ég orðið vör við það hversu margar stúlkur og konur hunsa það verkefni að fara í tékk. Mér finnst það sorglegt því ef þetta kemst upp nógu snemma eru batarlíkurnar mjög góðar, Eftir því sem líður lengra þeim mun minni eru líkurnar á bata. Það er hundleiðinlegt að fara í þessa skoðun en svo algjörlega þess virði. Ég hvet því allar konur til þess að panta sér tíma á leitarstöðinni eða hjá kvensjúkdómalækni í skoðun."

Batahorfur góðar

Hverjar eru batahorfurnar hjá þér? "Batahorfur eru góðar þegar þetta finnst snemma í ferlinu sem var tilfellið hjá mér," segir Guðrún.

http://www.krabb.is/leitarstod