Kynlíf er einstök reynsla

Liam Neeson kveðst ekki mundu vilja vera unglingur í dag. Hann telur að samfélagið sé gegnsýrt af klámi og kynlífi og að það hljóti að vera erfitt fyrir unglinga að takast á við þetta áreiti.

„Það er of mikið af upplýsingum um kynferði allt í kringum okkur; í fjölmiðlum, í auglýsingum, einfaldlega alls staðar. Þetta hlýtur að vera ruglingslegt fyrir þau," sagði Neeson í nýlegu viðtali. Hann á unglingssynina Micheál og Daniel með eiginkonu sinni heitinni, leikkonunni Natöshu Richardson. „Kynlíf er mjög, mjög einstök reynsla. Það er fullt af dásemdum og mér þætti leitt ef við kæmumst á þann stað að okkur þætti það ekki einstakt lengur. Tímarnir hafa breyst mikið frá því ég var ungur, það er á hreinu."