Merkjavörur leynast í Rauða krossinum

9LíF er second hand verslun í kjallara ATMO sem selur sérvalinn fatnað og fylgihluti í samstarfi við Rauða kross Íslands. Allur fatnaðurinn og fylgihlutirnir eru héðan og þaðan úr skápum landsmanna og ekkert er innflutt erlendis frá. ,,Þegar ATMO opnaði langaði okkur að nýta kjallarann í eitthvað skemmtilegt.

Okkur barst það til eyrna að Rauða krossinum bærist meira magn af fatnaði en þau náðu að komast í gegnum og okkur langaði til að reyna að búa til enn meiri verðmæti úr þessu mikla magni í stað þess að senda það úr landi", segir Hildur Rósa Konráðsdóttir verslunarstjóri í 9Lífum.

En 9Líf er engin venjuleg Rauðakross búð. Hún er mjög snyrtilega sett upp og ef vel er að gáð leynast þar meira að segja merkjavörur á spottprís. Hildur Rósa handvelur allt sem fer inn í búðina af færiböndum Rauða krossins. Hún reynir að hafa vöruúrvalið fjölbreytt en sækist þó mest eftir klassískum og vönduðum flíkum. Endrum og eins finnur hún fatnað frá rándýrum hátískumerkjum.

,,Íslendingar eiga svo mikið af fíneríi í skápunum sínum, þannig þetta kemur mér alls ekki á óvart. Fólk er svo gott að gefa áfram það sem það finnur ekki not fyrir lengur og styrkja þannig gott málefni", segir Hildur, en stærstur hluti ágóðans rennur beint til Rauða krossins.

Meðal hluta sem hafa ratað inn í 9 Líf eru Kenzo ullarjakki, Christian Dior blússa og vesti, Sonia Rykiel velúrgalli, Burberry kápa, Salvatore Ferregamo peysa og svo mætti lengi áfram telja.

Fyrir áhugasama er verslunin mjög virk við að setja inn myndir á facebooksíðu sína. Hana má finna hér.

Facebooksíðan - sjá hér.