„Leið eins og ég væri á annarri plánetu“

Fleiri en 700.000 manns hafa séð myndband Bandaríkjamannsins Chris Smith þar sem hann griplar víðsvegar um Ísland. Sagt er frá þessu á vef CNN þar sem einnig er tekið viðtal við Chris.

Aðspurður hvernig það sé að vera orðinn internetstjarna segir Chris: „Nú borða ég aðeins hina bestu osta og drekk aðeins fínustu árganga af víni. Nei, ekkert hefur breyst. Ég fæ góða tilfinningu af því að fólk taki eitthvað jákvætt frá myndbandinu. Kannski sjá þau að gripl er ekki bara notað sem opnunaratriði fyrir galdramenn.“

Hann segir gripl vera hluta af lífi sínu og hann sé alltaf með bolta með sér. Upprunalega var tilgangur myndbandsins að sína fjölskyldu og vinum frá ferð hans um Ísland.

Hann segir einnig hafa verið að mestu einn á Íslandi og hann hafi þurft að sætta sig við að vera einhver maður að handahófi sem var að gripla fyrir geitur í miðjum óbyggðum.

 Chris segir dramatíska fegurð Íslands hafa verið það besta við ferðina. „Mér leið bókstaflega eins og ég væri á annarri plánetu. Þegar ég keyrði um fékk ég þá tilfinningu að ég væri sá eini í heiminum sem vissi að þessi staður væri til.“