Myglusveppur í ráðuneyti velferðarmála

Myglusveppur plagar hluta velferðarráðuneytisins, sem er til húsa í Hafnarhúsinu við Tryggvagötu í Reykjavík. Undir ráðuneytið heyra bæði heilbrigðisráðherra og ráðherra félags- og húsnæðismála.

„Framkvæmdir vegna þessa standa yfir,“ segir Margrét Erlendsdóttir, upplýsingafulltrúi ráðuneytisins. Hluti starfsfólks hefur á meðan verið fluttur og fengið aðstöðu í húsnæði Stjórnarráðsins í Skuggasundi.

Síðasta vor segir Margrét hafa þurft að taka í gegn skrifstofugang á þriðju hæð ráðuneytisins vegna myglusvepps.

Á ganginum eru tólf skrifstofur og hafði hluti starfsfólks fundið fyrir óþægindum. Rannsókn staðfesti svo grun um myglusvepp. Þá tóku framkvæmdir tæpa þrjá mánuði.

„Í haust vaknaði svo grunur um að myglusveppur leyndist víðar í skrifstofuhúsnæði á þriðju hæðinni og var það staðfest með frekari rannsókn,“ segir Margrét.

Því hafi verið ráðist í úrbætur að nýju og taki framkvæmdirnar, sem séu i tveimur áföngum, til sextán skrifstofa auk fundaaðstöðu. „Fyrri hluti framkvæmdanna er langt kominn,“ segir Margrét. Faxaflóahafnir eiga húsið og annast framkvæmdir.

Að sögn Margétar leiddi könnun í ljós að fjarvistir starfsfólks vegna veikinda séu ekki meiri en þær hafi verið síðustu ár, en bornir voru saman veikindadagar frá hausti 2011 til 2012 og frá hausti 2012 til 2013. „Því er hins vegar vandsvarað hvaða áhrif myglusveppurinn hefur á heilsu fólks og fjöldi veikindadaga veitir ekki skýr svör við því.“

Margrét segir líka ljóst að fólk sé misnæmt fyrir sveppinum, meðan sumir finni fyrir einkennum kenni aðrir sér einskis meins.

Hvar má búast við myglusveppi í húsum?

Myglusveppur getur komið upp í húsnæði þar sem raki kemst inn eða vatn lekur. „Yfirleitt fær þetta ekki að grassera,“ segir Vigfús Halldórsson, forstöðumaður framkvæmda hjá Fasteignum Ríkissjóðs. Svona mál geti þó ávallt komið upp í eldri húsum. „Fyrsta skrefið er að koma í veg fyrir lekann, hvort sem hann er í lögnum eða kemur að utan. Svo þarf að hreinsa upp þann svepp sem kominn er.“ Í slæmum tilfellum segir Vigfús að skipta þurfi um gólfefni þar sem sveppur hefur komist undir og eins sé slæmt ef smit hefur komist í gipsplötur í veggjum. Í heilu timbri sé hins vegar hægt að pússa sig niður úr sýkingunni.